England tana khel tlak Toney

Inrinni zan khan Brentford-in Leeds United 5-2 in an hneh a, Ivan Toney-a'n hattrick a siam a, Bees tan goal 52 a khung tling ta bawk. Danish coach Thomas Frank chuan Toney hi England tana khel tlak a nih thu a sawi.

Kum 26 mi Toney hian penalty aṭangin goal hmahruai a khung a, goal hnihna hi freekick aṭanga a khung niin goal class tak a ni. English striker hian hattrick siam nan goal ropui a khung a, cool taka a khalh kual hnuah a chip lut - Leeds tlarhnungten dan ngaihna an hre lo.

Frank chuan, "Ka thlirnaah chuan Harry Kane hi a chung berah a awm a, tun hnaia an chet ṭhat dan en chuan Toney hi pahnihna a ni," tiin a sawi. England captain Harry Kane hian Tottenham-in 2-1 a Fulham an hneh ṭumin goal pawimawh a khung.