VAR puihnain Chelsea an chak
Chelsea-in nipui bazarah sum an hmang tam a, transfer tawp hnua match hmasa berah West Ham United 2-1 in an hneh. Blues-in point thum an hmuh theihna kawngah VAR thutluknain hmun pawimawh a chang a, sawizui pawh a hlawh hle.
Hammers-in Antonio hmangin hma an hruai a, Blues-in substitute Ben Chilwell leh Kai Havertz hmangin an lehthal. Minute 90-naah Hammers-in Maxwel Cornet hmangin si phurh sutah an inngai a, referee Andrew Madley-a'n mual sira monitor hmanga thil thlen dan a ennawn hnuah a thutlukna sutin Hammers goal khung a pawm lo!
£255 an seng
Chelsea neitu thar Todd Boehly an nei a, Roman Abramovich awm loh lang lo khawpin American sumdawng hausa hian sum a seng nasa. Hammers lakah hian nipui bazara lakluh Raheem Sterling, Kalidou Koulibaly, Wesley Fofana leh Marc Cucurella bakah season liam taa loan hmanga an chhuahtir Conor Gallagher ten bul an ṭan vek.
Blues hian nipui bazarah pound maktaduai 255 an seng a, transfer tawp nia an lakluh Pierre-Emerick Aubameyang-a'n a hmunah inkhel a rawn thlir bawk.
Thomas Tuchel-a hote hian ṭhatpuina tham player lalutin lang mah se season liam ta aiin an game a la nghet lo zawk. First half-ah chance mumal tak tih tur a awm lo. Hammers-in second half-ah goal an khung hmasa zawk a, corner aṭanga ball kal chu buai nuaih karah Antonio-a'n minute 62-naah a khung. Chelsea an talbuai a, chak lo thei dinhmunah an ding.
Mi hlui an hlu
Chelsea-in bench aṭangin Chilwell leh Kai Havertz te an luhtir nghal a, player pahnih hi danglamna thlentu an ni. Minute 76-naah Thiago Silva ball vawrhluh chu Chilwell-a'n a tauh hnuah a um zui nghal a, Hammers keeper Lukasz Fabianski kap karah a khung.
Hammers-in Maxwel Cornet hmangin hmahruai theihna hun ṭha nei mah se Ivorian forward hian goal ban a tauh per. Blues erawhin hun ṭha an bawpelh lo a, Chilwell-a cross chu Havertz-a'n minute 88-naah chakna goal khung nan an hmang.
Chelsea-in defender pawimawh an chân avangin loh theih loin tlarhnungah mi thar chhawr a ṭul a, chutihrualin Tuchel-a'n an ṭhat dan berin a la rem fuh lo niin a lang. Hammers nena an inkhelh bikah mi thar aiin mi hlui an hlu.
Sawisel hlawh VAR
Hammers an beidawng lo a, goal an chhuah hnuah an nawrlet nghal. Reece James ball tauh let chu Jarrod Bowen-a'n um lutin keeper Edouard Mendy a nam per a, hemi per hi Cornet-a'n changin ṭha zetin a pet goal.
West Ham player-te leh ṭantute an goal khung lawmin an thawm a ṭha hle. Mendy erawhin VAR a awm tih hre karin a na uar sawt a, VAR lamin thil thlen dan ennawn turin referee an hrilh. Referee Andrew Madley-a'n Bowen-a'n keeper Mendy a pal fuh avangin foul a ham ta zawk - Hammers tan chuan pawm thiam a har khawp ang.
Hammers boss David Moyes chuan, "Goalkepeer khan ball kha yard nga vel laiin a tiper a, man leh ngaihna a awm tawh lo. A dar (shoulder) a hliam ta emaw tih turin a awm zui. VAR-in mual sira monitor en tura referee-a ti kha ka dem a, referee pawh a thutluknaah a ding tlang tur a ni," tiin VAR official Jarred Gillett leh referee Andrew Madley te a dem hle.
Moyes chuan sawi chhunzawmin, "Tihsual tam tak ka nei a, referee pawhin tihsual tam tak a nei bawk. Mahse referee chu tihsual siam ṭhat nan VAR a awm," a ti a, tihsual siam ṭhatna ni loa tih dik siam sual nana VAR an hmang chu pawi a tih thu a sawi. Hammers captain Declan Rice pawhin, "VAR thutlukna chhiat ber ṭum a ni," ti hialin an goal pawm loh chungchang a sawi bawk.