AIFF secretary thar Dr. Shaji

India rama football thuneitu sang ber, All India Football Federation executive committee thlan thar chu Inrinni khan Football House, Delhi-ah an ṭhukhawm a, Football Delhi president ni lai Dr. Shaji Prabhakaran chu Secretary General atan thlan a ni.

AIFF president Kalyan Chaubey chuan, "FIFA Regional Development Officer a nih laia Dr. Shaji tawnhriat hi Indian football hmasawn nan a ṭangkai dawn a ni," a ti a, executive committee member zawng zawngin Shaji hi Secretary General turin an pawm vek.

Indian football thuneitu sang ṭhukhawm hian I League CEO Sunando Dhar chu Deputy Secretary General turin an thlang bawk a, AIFF Technical Committee Chairman atan Indian football legend IM Vijayan thlan a ni.

AIFF Technical Committee-ah hian Eugeneson Lyngdoh, Climax Lawrence, Harjinder Singh, Arun Malhotra leh Pinki Bompal te chu member atan ruat an ni a, Advisory Committee chairman atan India captain hlui Shabbir Ali ruat a ni bawk.

Football House-a ṭhut-khawmah hian AIFF hruaitu atana thlan tharte chu an tel deuh vek a, MFA honorary secretary Lalnghinglova Hmar pawh a tel.

Hetihrual hian executive committee member tura ruat, footballer hlui paruk zinga mi Bhaichung Bhutia erawh a tel lo a, AIFF President inchuha tling zo ta lo Bhaichung chuan executive committee member-a ruat a nihna chu a pawm dawn leh dawn lohah thutlukna a la siam loh thu a sawi.