City leh Liverpool an chak zo lo

Manchester City-in Aston Villa khelmualah awlsam takin hnehna an chang tura ngaih a nih laiin an chak zo lo a, Steven Gerrard-a enkawl team nen hian 1-1 in an inhnehtawk.

City tan Erling Haaland chuan tun season Premier League-a a goal 10-na a khung der a, mahse, Villa Park-a inkhelah mualneitu tan Leon Bailey chuan si phurh sutin, hun tawp thleng goal dang a lut tawh lo.

Jurgen Klopp-a enkawl Liverpool pawhin hnehna an chang zo lo - Bournemouth leh Newcastle United laka an chak hnuah Reds hi an insiamṭha tawhah tam takin an ngai a, mahse, ngaih ang ringawt erawh a ni lo.

Everton khelmuala Merseyside derby inkhelah Liverpool-in vawi 23 ngawt shot nei mah se goal an khung thei lo a, an ṭhenawm club nen hian 0-0 in an inhnehtawk.

A hming Haaland
Tun hnaia City khelh dan leh Villa dinhmun thlirin, khaikhin rual an ni lo a, team pahnih an inthlau - Villa Park-ah Pep Guardiola naute tan point thum hlawhchhuah harsa lo tura ngaih a ni.

First half-ah goal khung lo mah se City tan Haaland chuan minute 50-naah goal hmahruai a khung a, Kevin de Bruyne ball cross ṭha zet chu a awmna tur taka lo awm Norwegian striker hian goal-ah a chantir.

Premier League match ruk aṭanga goal 10 khung thei Haaland hian goal dang khungna remchang pawh vawi hnih ngawt a nei. Mahse, Villa keeper Emiliano Martinez chuan ṭha zetin a dang ve ve - KDB-a'n freekick hmanga crossbar a tih per pawh uiawm tak a ni.

City-in an chance neih chhawr loh an tuar zui a, minute 74-naah Bailey chuan Jacob Ramsey-a siamsak chu ṭha zetin goal-ah a chantir - hun tawp thlengin goal dang a lut lo a, 1-1 in team pahnih an inhnehtawk.

Beiseina
Villa tan Philippe Coutinho-a'n chakna goal khungna remchang a nei a, mahse, assistant referee-in offside a phar avangin Brazilian forward hian pet hman mah se goal-ah pawm a ni lo.

Villa boss Gerrard chuan, "Zai dawh tak chungin match official-te kha inkhelh zawhah ka bia a, an tihsual en letna hun ka siamsak. Referee khan a ham hma lutuk a, khatiang ang thutlukna harsaah chuan nghah hret hi a pawi lo. Kan goal hnihna khung thei kan ni a, mahse, official-te pawhin an tihsual an pawm a ni," a ti.

Premier League match thum zet a zawna an tlawm hnuin Villa-in City an inhnehtawkpui a, dinhmun derthawng Gerrard pawh a nui ve leh ta. Liverpool legend chuan, "Ball pet hma hauhin tumahin chance min pe lo," a ti a, an result chu a chhuang hle.

City boss Pep chuan, "Game ṭha tak a ni - minute 90 chhunga kan target-a shot an neih chhun aṭangin goal kan chhuah a, thil ho tê ṭhenkhat leh goal hmaah kan duh ang takin kan che thei lo Bawk. Game kan thunun laiin goal hnihna khung theihna hun kan nei a, mahse, kan chhawr si lo a ni," a ti.

Mangan a hun
Liverpool-in Everton khelmualah goal an khung thei lo a, Premier League match ruk aṭangin point kua chiah an la nei - Klopp-a naute tan bul ṭan dan ṭha tia sawi tur a ni lo a, Liverpool an la insiamṭha lo.

Goodison Park-ah team pahnihin goal khung lo mah se inkhel hmuhnawmna erawh a bo phah lo - Everton tan Tom Davies chuan woodwork a tih per a, Darwin Nunez leh Luis Diaz ten uiawm takin an tih per ve bawk.

Everton tan keeper Jordan Pickford chu 'a changtupa' a ni a, Nunez-a shot a dan perin bar a per te, Roberto Firmino chance duhawm vawi thum ngawt a dan te, ṭum danga Mohamed Salah khung ṭhin post-a a lo dan per hmante chu pui tak a ni.

Liverpool-in season hmasaah nomawi pali meuh chawi beisei chungin season duhawm tak an hmang a, FA Cup leh League Cup-ah an champion - tun season-ah Community Shield nen bul ṭan mah se, league-ah beisei an phak lo zui a, Klopp tan ngaihtuahna thar sen ṭan a ṭul.

An vannei
Liverpool-in an chance neih, an khung loh zozai an thlirlet ang a, an ui viau ang - chutihrual chuan an vanneihna a awm ve bawk a, Reds academy chhuak Conor Coady goal khung chu VAR hmanga ennawn a nih hnuah pawm a ni lo a, Amadou Onana laka a chet dan avanga Virgil van Dijk-a'n yellow card ringawt a hmu chu a vannei viau bawk.

Klopp chuan, "Bul ṭan dan duhthusam a ni lo a, match ruk khelh hnua point kua hmuh hi duhthu kan sam dan chu a ni lo chiang. Mahse, hei hi kan point hmuh chu a ni a, heta ṭang hian kan insiamrem ang - lungrual taka kan hun harsa hi kan paltlang ho theih chuan, season duhawm zawk kan hmang thei ang," a ti.

Nunez-a'n goal khung lo mah se Uruguayan striker lo kir leh thei ta hi Reds tan thu lawmawm a tling a, Diogo Jota pawh hun tawp dawnah a tlan lut ve leh tawh a, Thiago Alcantara-a'n training a zawm ta bawk - Liverpool fan-ten chak zawh loh karah thu lawmawm hriat tur an nei.

Everton boss Lampard chuan a naute fakin, "Kan khel ṭha takzetah ka ngai a, 0-0 inkhelah chuan hetiang hi en châkawm chu a ni. Hetiang ang game-ah chuan keeper chet ṭhat a ngai a, Pickford khan a ti ṭha ṭhin hle. Team pahnihin chak kan tum a, ka player-te sawiselna tur ka hre lo - kan khel ṭha a, hma kan sawn zel e," a ti a, result-ah a lawm.