A hunah Olivier Giroud a inlar

Hliam vangin season tir lamah bul a ṭan thei lo a, a inkhelh chinah goal a khung mai lo bawk - mahse Olivier Giroud chu a hunah tak AC Milan tan a inlar leh ta. France international goal hmangin Inter Milan 3-2 in an hneh.

Inrinni zan Serie A inkhel dangah Juventus chu Fiorentina nen 1-1 in an inhnehtawk. Napoli erawhin Lazio 2-1 in an luh chhuah thung, point 11 hmuin table chung berah an awm, pahnihna Milan nen an point neih zat a inang.

Milan an chak
San Siro-a inkhelah AC Milan chu mualneitu zawk an ni a, mahse goal an chhuah hmasa. Minute 21-naah Marcelo Brozovic chuan goal hmahruai a khung, amaherawhchu chawlhlawk hmain Milan tan Rafael Leao-a'n a sut.

Second half tir lamah Giroud-a'n an hmahruaina goal a khung, an dinhmun sawhngheh nan Leao bawkin a khung nelh. Goal thum an chhuah hnuah Inter lamin Edin Dzeko hmangin an khung belh ve a, mahse point hmuh nan a tawk zo tawh lo.

Inter lamin hliam vangin Romelu Lukaku an chhawr thei lo, an goal nawr a na tawk lo bawk. Champion lai Milan erawh an ṭhat dan berin la khel lo mah se thawhhona ṭha bawk an hmang ṭangkai leh a, season hmasa an champion theih chhan tih an la hre reng.

Insiamṭhat a ngai
Inter Milan coach Simone Inzaghi chuan, "Tuna kan team ang tho hi nikum ṭha taka khel thei kha kan ni, goal khung kan harsat bakah kan tlarhnung a phui lo tlat mai hi a mak, a rang thei ang bera kan siamṭhat a ngai dawn.

"Goal hnih ṭha takin kan khung thei kha a lawmawm, chutih rualin kan lama goal thum a lut kha a pawi," a ti. Match nga an khelh tawh aṭangin vawi hnih an tlawm der tawh a, league bakah Champions League an khelh zui dawn avangin hmabak a hautak.

Milan coach Stefano Pioli chuan, "Inter khan kan ṭhat lohna lai an zawng a, team ṭha zawk nih an tum. Mahse, min beihna kawng hrang hrangah khan kan ṭha zawk a ni tih kan lantir thei, player rilru huaisen leh rilru put hmang dik vang a ni," a ti.