Silly Point ; Tunlai Mizoram Cricket (Part 1)

UAE lamah nizan khan Asia Cup Super 4-ah India leh Pakistan an intum leh a, he thu buatsaih lai hian a tawp kan hre hman ta lo. Tun ṭumah chuan tun hnaia Mizoram cricket-in bung thar a kaina chanchin thailan kan tum dawn a ni.

Duleep Trophy
BCCI chuan Duleep Trophy chu tun season aṭangin a buatsaih leh dawn a, inelna hi zone anga kalpui a ni. Tun hmain zone inelna hi a awm tawh ṭhin a, 2015/16 season hnuah zone angin inelna hi neih leh a ni ang.

Kumin aṭangin hian North-East zone team thar a lo piang ve ta a, Hmarchhak state panga Nagaland, Sikkim, Arunachal, Manipur leh Mizoram aṭangin cricketer ṭha rual thlan khawm an ni. Season liam taa (2021/22) an khelh dan aṭangin player-te hi an thlang.

Mizoram aṭang pawhin ka teammate, ṭhianṭha leh naute pahnih G Lalbiakvela, Luangmual leh Bobby Zothansanga, Chaltlang te koh ve an ni. Anni pahnih hi Mizoram rinrawl an ni a, kum kha leh chen team khata awm ho kan nih avangin an theihna ka hria a, North-East zone team-a tel turin an ṭha tawk tih hi ka ngaihdan a ni.

Kum 2018 khan BCCI hnuaiah professional cricket khel turin kan han arkhawthimdai ve kha a ni a, hotute duhsaknain captain hna ka chelh a, BV-a leh Bobby te hi khata ṭanga ka khelhpuite an ni. Hma an sawn dan leh tun ang dinhmun thleng tura an thawhrimzia hre chiang ber tute zingah ka inchhal ve a ni.

Bhubhaneshwar khawpuia BV-a'n Sikkim batsman rual an ṭhiat darh tak tak mai lai te, a hnu Kolkata-a Indian Test Cricketer leh IPL Star Stuart Binny te hoin khelh dan lek hre loa an vawm chi ai maite kha hman ni lawk a la ni.

Bobby-a'n Manipur batting line up a ṭhiah darh ṭum phei kha chu eye witness hnai ber ka ni ta hial awm e. He thu ziaktupa hian he column hming putchhan Silly Point-ah vawi 3 ngawt mai ball ka lo mansak nghe nghe a nih kha.

Athlete dik
Infiammi satliah, infiammi ropui leh infiammi dik takte hi awm hrang ta se, ka teammate hluite pahnih hi khawiah nge an awm ang, tih ka ngaihtuah ṭhin. BV-a leh Bobby te hi chu 'Gentleman Athlete - 'infiammi dik tak' huang chhungah ka thailut nghal e.

Kum khati leh chen lo khawsa a, chhungkua ang maia lo awm ta chu, zep thu a awm lo, thu han inhmuh loh chang te, hmai sen sa deuh thoa dressing room-a ṭhahnem ngaih luat avanga han inkawh changte a awm. Chutiangah chuan professional an nihzia a lang ṭhin a, senior player dinhmun luah thiam êm êm te an ni.

Keimah ngei pawh, 2019 season khan khelh ṭhat tawk loh vanga beidawn rum rum chang ka nei a, bansan mai duh chang te ka nei hial. Chutiang hunah chuan BV-a leh Bobby ten ka hotel pindana min rawn fuih changte a awm.

Dressing room-a min han kuah chunga min titi pui changte kan mitthla hian, ka zinkawnga mi pawimawh ber te zinga mi an ni ngei ang. He thuziak hmang hian retire tawh hnuah, anmahni chanchin ziak pahin lawmthu kan hrilh nawn ni teh se.

BV-a ball vawm kawh lutuk leh Bobby-a'n a han ṭhuai vir hi team practice-na a min vawm hlum bertu an ni a, anmahni vang hian restaurant-ah pawh ei tur ka 'show' ngun phah. Cricket ka chawlhsan chhante pawh hi BV-a leh Bobby te ṭhat vangte pawh hi a ni ta hial ang.

Kolkata Eden Garden Dressing room-a cricketer ka nihna anga hun hnuhnung ka hman khan, kan hawi kual vel a, vawi khat mah player angin ka let tawh dawn lo tih ka inhria.

Hrehawm pawh ka ti rilru viau a, amaherawhchu kil khatah senior player BV-a te, Bobby te, Amatea etc lo ṭhu ka hmu a, ka ngaih a ngam sawt. Ka tel lai aiin ka kalsan hnuah team dressing room a hausa sawtin, an ṭha sawt dawn tih ka hmu a, kha kha min tithlamuangtu a ni.

Tuna leilung awm hnua, Duleep Trophy North East Team hmasa bera Zofate meicher chhi hmasa tur an ni hi an phu hliah hliah e.

Zep thu a awm lo, an chak kher lo ang. An khingpui tur West Zone hi Ajinkya Rahane leh a hote an ni a, Indian team player hlang deuh thaw an tum dawn a, an inthlau hle.

Mahse, result lam a ni lo, he an tawnhriat aṭang hian, Mizoram Cricket leh Cricketer lo la awm zel turten hmasawnna tur ṭhahnem tak min rawn fah hawn tur an nei dawn tih a chiang.

- K. Vanlalruata