Zanin dar 11:25-ah Liverpool chuan Champions League group stage match khel turin Red Star Belgrade an lenchilh dawn a, Liverpool zinkawng a awlsam rih hle.
Reds hian match thum khelh tawhah point ruk hmuin hmahruaitu an ni a, Napoli (5 pts) leh Paris Saint Germain (4) ten an hlat lo. Red Star hian point khat chiah an la hmuh avangin last 16 luh an beisei ngam kher tawh lo ang.
Liverpool-in team nem bera ngaih Red Star a tir lamah a zawna an tum theih avangin an vannei a, PSG leh Napoli hi vawi khat ve ve la hmachhawn dawn mah se Red Star lakah an chak nawn thei a nih ngat chuan hahdam takin an hmachhawn thei ang.
PSG leh Napoli hi zanin dar 1:30-ah an intawng dawn a, an inkhelhna tur hmun hi Napoli khelmualah a ni a, Paris khawpuiah 2-2 in an inhnehtawk tawh - zanina chak lo zawk tan hmabak a ko sawt adawn.
A mai mai lo!
Liverpool-in Red Star an hmachhawn hmasakah 4-0 ngawtin an sawp a, an inkhelhna hmun hi Anfield a ni. Result hmasa thlirin Liverpool tan chak harsatna tur a awmin a lang lo a, Jurgen Klopp ngaihdan erawh a dang thung.
Reds manager Klopp chuan, "Naupang chhia anga infiam mai mai turin kan kal dawn lo a, kan hmaa inchhawp game hi inkhel pawimawh tak a ni tih kan hriat a ṭul a ni," tiin a naute chu serious turin a fuih.
"Kan hmaa inchhawp hi game harsa tak a ni dawn a, hnehna chang tur chuan theihtawp kan chhuah a ṭul ang. Belgrade-ah hian hnehna chan tumin kan kal dawn a ni," a ti a, point thum aia tlemah lungawi a tum lo.
Liverpool hi Premier League-ah hneh loh tawng loin an kaltluang mek a, match 11 chhung chu an tlawm tawh lo. Champions League-ah erawh Napoli an hneh lo tawh a, PSG an la awm bawk si avangin Red Star laka chak loh chuan a pawi 'thui' ang.
Tu nge khel dawn?
Liverpool coach Klopp-a'n tlarhnung lamah Alisson, Trent Alexander-Arnold, Joe Gomez, Virgil van Dijk leh Andy Robertson te chu a rinrawl an ni a, anni inkawp hian Premier League-ah goal li chiah an la chhuah.
Hetihrual hian a khelh chhuna khel ṭha thei tak Dejan Lovren en kan a thiang lo a, league match khel chau hlim an nih bawk avangin Klopp-a'n tlarhnung a siksawi deuh a nih pawhin a mak lo ang.
Season hmasaa goal 91 khungtu Mohamed Salah, Sadio Mane leh Roberto Firmino te chu Klopp-a rinrawl an la ni reng a, chawlh hahdam mamawh an awm a nih chuan Daniel Sturridge an la kawl cheu bawk.
Switzerland midfielder Xherdan Shaqiri chu a sahimna ngaihtuah a nih avangin Klopp-a'n a hruai ve dawn lo. Shaqiri hian World Cup-a Serbia an hneh ṭumin Serbian fan-te huat zawng takin a goal khung a lawm a, an hmachhawn tur hi Serbian club an nih bawk si avangin hruai tel a ni lo.
Shaqiri hruai loh karah Naby Keita erawh chhawr theihin a awm leh tawh a, Gini Wijnaldum, James Milner, Fabinho leh Adam Lallana te chu Klopp-a'n duhthlan tur a neihte an ni.
A hmuhnawm dawnṬ
Liverpool inkhel a zo ang a, PSG leh Napoli inkhel en turin a awm lehnghal dawn - team pahnih intawn hmasak aṭanga teh chuan zanin inkhel hi a hmuhnawm dawn tih a chiang.
Napoli hian PSG an inhnehtawkpui hnuah match hnih an khel leh tawh a, an match hnuhnung berah Empoli chu 5-1 ngawtin an sawp. Goal khung an thiam tih a chiang a, attacking football khel ṭhin PSG lakah an inthlahrung bik lo ang.
French club PSG an kaltluang rih hle bawk. Ligue 1 lama an match hnuhnung berah Lille chu 2-1 in an hneh a, European top five league-a match hmasa 12-a hnehna chang thei awmchhun record an siam.
Napoli boss Carlo Ancelotti chuan, "Kan group-ah hian Liverpool an awm bawk avangin zanin inkhel result hian hma hun thui tak a hril dawn. PSG hian player ṭha tak an nei a, hnehna chang tur chuan theihtawp kan chhuah a ṭul dawn a ni," tiin a sawi.
