Djokovic hnehin Khachanov a champion

Russia tlangval Karen Khacha-nov chuan world number 1 thar Novak Djokovic hnehin Paris Masters champion a ni a, kum 22 mi tan Masters 1000 title hmasa ber a ni nghal bawk.

Pathianni zana final inkhelah Khachanov hian darkar khat leh minute 37 chhungin 7-5, 6-4 in hnehna a chang a, tun hnaia khel ṭha tluang tak Djokovic-a'n hneh loh nei loa match 22 a kaltluang tawh chu a tihtawp sak.

Nimin khan mipa tennis thuneitu sang ATP chuan world ranking thar a tichhuak a, Grand Slam vawi 14 champion tawh hian nomawi chawi zo lo mah se Rafael Nadal khumin a chung ber dinhmun a luah ta tho a ni.

World number 18 Khachanov chuan, "Ka tan chuan a hlu bik lutuk, tennis a khelh hun chhunga ka title lak hlu ber a la ni. Khawvela ṭha ber ni lai Novak Djokovic hneh chung ngeia season khar aia hlimawm hi a awm thei chuang lo," tiin a sawi.

Tennis season an hmang zo hnai tawh a, November 11-18 chhung hian O2 Arena, London-ah ATP Finals khelh tur a la ni. A thiam pariat inelnaah hian Kei Nishikori, Novak Djokovic, Rafael Nadal, Roger Federer, Alexander Zverev, Kevin Anderson, Marin Cilic leh Dominic Thiem te an inlan ang.