Rooney-a'n England tan match 120-na khel dawn

Wayne Rooney chuan England tan match 120-na a khel ngei dawn, November 15 hian Wembley Stadium-ah United States nen an intawng dawn a, ram tana a match hnuhnung ber a ni nghal ang.

Kum 33 mi Rooney hian ram tan goal 53 khungin goal khung hnem record chelh mektu a ni a, chutih rualin 2016 November thla a Scotland nen an inkhelh hnuah an ram jersey hi a la ha leh lo - mahse tunah chuan a tan hun ṭha leh hlu bik a inherchhuak leh ngei dawn niin a lang ta.

United States nena an inkhelh tur hi 'The Wayne Rooney Foundation international' an ti dawn a, an ram khelmual ṭha leh hmingthang Wembley chunga thir kul lian tak (Arch) chu rangkachak rawnga chei tur a ni ang.

England football thuneitu sang ber Football Association chuan Rooney tana zahna lantirna hun a nih tur thu an sawi. MLS club DC United tana khel lai Rooney chuan, "England tan Wembley-ah ngei mai match khelh leh chu ka châkin ka nghakhlel hle, coach Gareth Southgate leh FA lamin hetiang hun ṭha min pe hi ka lawm takzet.

"England tana khelh hi ka tan chuan chawimawina lian ber a ni a, a bik takin match 120-na khelh phei chu ka tan a hlu danglam bik lutuk. Tunah hian ka taksa dinhmun a ṭha a, USA nena kan inkhelh tur hi fans lam tan pawha thlir manhla tak a nih ngei ka beisei," tiin a sawi.