Inter hmachhawn turin Messi a dam tawh?
Zanin dar 1:30-ah Champions League group stage match khel turin Liverpool chuan Inter Milan an lenchilh dawn a, squad-ah Lionel Messi chu telh a ni.
Barcelona boss Ernesto Valverde chuan, "Messi a tel chuan kan vaiin kan khel ṭha ṭhin a ni," tiin an thiampuipa pawimawhna a sawi a, zanina a chhawr dawn leh dawn loh erawh a sawi chiang lo.
Catalan club hian Group B-ah match thum khel tawhin an la chak vek a, hma an hruai mek. Inter Milan, Tottenham Hotspur leh PSV Eindhoven ten an dawt.
Tottenham hian match thum khelh tawh aṭangin point khat chiah an la nei a, zanin dar 1:30-ah vek PSV an mikhual ang. Dutch club hi an hneh zo lo a nih chuan last 16 luh an beiseina chu an mangṭha fel thei ang.
Messi inhliam chu
October 21 khan Barcelona chuan 4-2 in Sevilla an hneh a, he inkhelah hian hliam vangin Lionel Messi chu lakchhuah a ni a, kar thum tal chawlh a mamawh tur thu sawi zui a ni.
Messi tel loin Barcelona hian Real Madrid chu 5-1 in an sawp a, an intawn hmasakah 2-0 in Inter Milan an hneh a, Copa del Rey leh La Liga-ah match khat ve ve khelin an chak bawk.
Beisei aiin Messi a dam chak a, kar thum chawlh mamawh tura an sawi kha kar hmasa khan club training a zawm fel leh der tawh - hetichung hian kar khat chu chawlh hahdam a la mamawh dawn nia sawi a ni.
Mahse, Barca-in Italy-ah an hruai tel a, bench aṭanga tlan luhtir a nih pawhin a mak lo ang. Catalan club an fimkhur a, an squad-a Messi hming zawnah hian, "Dam chiang lo chunga zin" tih an ziak tel kher.
Hlauhthawnawm lo?
Barcelona-in match thumah hnehna an chan vek avangin an dinhmun hi a hlauhthawnawm tawh lo tia sawi ngam a ni a, Inter erawh an hnuaia Spurs leh PSV hi anmahni la umpha thei an nih avangin chak a pawimawh.
Inter Milan coach Luciano Spalletti pawhin an khingpui team thiam zia a hai lo a, Messi chu khel lo hram se a duh thu a sawi! Italian manager chuan, "Messi hi khel lo hram se ka duh.
"Khelmual chhunga Messi a awm tawh chuan danglamna a thlen ṭhin a, a ho chuan Barca tlarhma goal nawr hi a na em em ringawt mai a ni," tiin a sawi.
Team pahnih intawn hmasakah Barcelona hian 2-0 in hnehna an chang a, kawng engkimah Inter Milan hian an phak lo - San Siro-ah erawh tlawm nawn an tum lo ang.
Hun hnuhnung?
Spurs-in match thum an khelh aṭangin point khat chiah an la nei thei a, PSV nena 2-2 a inhnehtawk ṭumin coach Mauricio Pochettino chuan an tan last 16 luh beiseina a tlem tawh thu a sawi chhuak hial.
Mahse, London club hian beisei an la nei thei. Barcelona umphaka group hmahruaitu nih beiseiawm tawh lo mah se pahnihna ni chunga last 16 luhna chance tal an la nei - zaninah an chak chuan.
Barca hian hnehna an chan a, Spurs-in PSV an hneh bawk chuan Inter nena an inthlauhna hi point hnih chiah a ni tawh dawn - Italian club hi an la tawng zui dawn a, hei hian an tan chanchin ṭha a thlen thei ang.
Spurs ṭantute tana hriat tel tur erawh Wolves laka 3-2 a chak hlim team hi an chau a, PSV lakah fimkhur taka an khelh a ṭul ang.