Man City an thiam fal ; An kal fal thei chuang lo!

Pep Guardiola-a'n a duh ang taka a naute a khelhtir thei a nih chuan team dang tan dan an harsa a, an kalna lam apiang a kaw duak zel mai niin a lang. Pep-a enkawl Manchester City hian Southampton 6-1 a sawpin Premier League hmahruaitu an ni.

Man City thiam zia sawi hmaih theih a ni lo a, chutihrual chiahin an hnuaia awm Chelsea leh Liverpool pawh thlauhthlak ngawt theih an ni bik lo - club pahnih hian point hnih bakin City hi an thlahfal duh lo. Pathianni zan inkhel dangah Blues chuan an mikhual Crystal Palace 3-1 in an hneh ve bawk.

Goal a sur

Etihad Stadium-ah goal hmasa ber lut turin nghah rei a ngai lo, minute rukna lekah Saints defender Wesley Hoedt chuan an mahni lamah a ti lut. Man City hian a hnu lamah chuan a khat mawi tawkin goal an khung chhunzawm reng.

Raheem Sterling-a'n goal hnih a khung bakah a ṭhiante khung tur vawi hnih a siamsak bawk a, striker Sergio Aguero chuan EPL goal 150-na a khung bakah David Silva leh Leroy Sane ten goal an khung bawk. Saints goal neih chhun hi Danny Ings-a'n City keeper Ederson-a penalty chawi a khung a ni.

Pep Guardiola-a'n a enkawl chinah Manchetser City hian league match bikah vawi 12 ngawt mai goal nga aia tam an khung thei ta a, a hun hman ang zatah manager dang ten an team te hi vawi ruk aia tam hetiang hi an tih tir thei ngai lo - Spanish manager hian goal khung thiam chungchuang bik team a din.

Pep a lawm

Inrinni zanah Liverpool leh Arsenal an inhnehtawk a, Reds hian league hmahruiatu nihna an chelh hman. Mahse, darkar 24 pawh a lian hmain Man City hi a chung berah an lawn leh nghal.

Manchester City manager Pep Guardiola chuan, "Ball kan chan loh lai pawhin kan tlan tam a, a bik taka ball kan chan khan duhthusam a ṭhain kan khel a ni. Kan khingpui goal bulah kan hlauhawm em em a, goal kan khung hnem khan kan vannei. Chutih rualin Southamton khan goal khung theihna hun ṭha an insiam nual tih erawh kan hriat tel a ngai," a ti.

EPL champion lai hian Nilaini zanah Shakhtar Donetsk nen Champions League an khel zui dawn a, kar tawpah Manchester United nen an inkhelh leh nghal dawn avangin an ṭan mar a ngai hle ang - league bikah hian vawi khat chetsual hlekah an dinhmun a la danglam thei.

A la tawk lo

Striker sawisel hlawh Alvaro Morata-a'n a ṭha tawk a nih tih lantir nan Crystal Palace lakah goal hnih a khung a, Spanish striker hian khel ṭha viau mah se Chelsea manager Maurizio Sarri chuan a la tawk loh thu a sawi.

Pound maktaduai 60 man Morata hian Premier League match 40 a khelh aṭangin goal 14 chiah a khung, Real Madrid player hlui hi a tirah beiseina sang viau mah se tun dinhmunah chuan rinrawl a ni phak rih lo.

Blues manager Sarri chuan, "Striker rinawl a ni chhunzawm dawn em tih ka sawi thei lo, chutih rualin chumi tur chuan amah hian theihna a nei. Amah hian inrintawkna a neih san a ngai a, a chang chuan a chiai hma deuh hlek ṭhin a ni," tiin a sawi. A striker hi a ṭhat thu sawi mah se a koah mawhphurhna lian lutuk a pe duh rih lo niin a lang.

Hazard a dam

Real Madrid leh Juventus forward Morata goal khung vangin Chelsea an lawm a, an lawmna belhchhahtu chu match thum an chhawr theih loh tawh Eden Hazard a dam leh tawh hi a ni. Inkhelh ṭan hmain Sarri-a'n minute 90 chhung khel tura a la inpeih loh thu a sawi a, bench-ah hun hman hmasak tir a ni.

Belgium international hi minute 64-naah luhtir niin, khelmual a luh aṭanga second 91 lekah Morata goal khung tur a siamsak. Blues boruak a ṭhat chhunzawm a, minute nga hnu lekah Morata leh Marcos Alonso te thawhrah sengtu Pedro chuan an goal thumna a khung.

Italian manager Sarri chuan, "Palace kha an khel ṭha hle a, a nihna takah chuan min chhaih buai hman a ni. Mahse, hetiang hunah tak hian player ṭha leh fing kan mamawh a, a chhanna chu Eden kha a ni. Ani khan mamawh hunah tak danglamna a rawn siam," tiin a sawi.

Chelsea hian Ningani zanah Europa League match khel turin Belarus club Bate Borisov an lenchilh dawn a, kar tawp league match-ah Everton nen an mikhual thung ang. Palace erawh Inrinni zan hian Tottenham nen an intawng leh dawn a ni.