Kickboxer nena intawng tur Mayweather

American boxer ropui Floyd Mayweather chuan a hmachhawn leh hmasak ber tur a tichiang ta a, Japanese kickboxer ropui Tenshin Nasukawa nen December 31 khian Japan-ah an intawng ang.

Mayweather hian August 2017 khan UFC fighter ropui Conor McGregor chu boxing-ah awlsam takin a hneh a, tun hnaiah UFC star Khabib Nurmagomedov leh boxer Manny Pacquiao nen sawizawm ni mah se rin loh lam a hawi ta zawk.

Kum 41 mi fighter chuan, "Thil danglam tih ka duh a ni. US pawn lamah fight hmachhawn ka duh a, mipui ten an duh em em thisen, thlan leh mittui chu hmuh tir ka tum a ni," a ti.

Fighter pahnih inhma-chhawnna tur hi boxing nge kickboxing-ah zawk, tih chu tih chian a la ni lo a, Mayweather chuan rei loteah engkim a chian tur thu a sawi.

Kum 20 mi Nasukawa hian kickboxing-ah 27-0 record a nei a, MMA-ah 4-0 record a nei bawk. RIZIN Fighting Federation hnuaiah a awm mek a, Mayweather chuan he mixed martial arts company nen hian thawhhona ziakin Nasukawa nen hian in fight turin an ti ta a ni.