Chhinga Veng an him, BVT tan beisei tur a awm
Mizoram chhung inelna sang ber Mizoram Premier League season tawp boruak hi chhiarkawp dan aṭanga thlirin a ngaihnawm a, chutihrualin number aṭanga teh ringawt chuan a ngaihnawmna a pawh pha lo a, team dinhmun hriat telin a ngaihnawm zual.
Chhingcows an him
Chhinga Vengin season bul an ṭan ṭhat an vanneih pui a, match 11-ah point 23 hmu tawhin anni chiah hi semifinal lut tawh a ni. Chhingcows hian season liam ta khan match 11-ah point 26 an hmu tawh a, point thum chauhin season liam ta an pha lo.
Chutihrualin Chhinga Veng hi table chung berah awm mah se khelmualah erawh an fal lo. Semfiinal lut chiang tawh mah se an champion kum ang lo takin final leh champion an la hnaih lo a, knockout stage-a Lalsangzuala Hmar hote hmachhawn hi vanduaina niin a lang tawh lo.
Beisei nei BVT
MPL ngaihnawmna tak chu table hnuai lam dinhmun hi a ni a, round 11 khelh zawhah table mawngphaha awm Bethlehem Vengthlangin chhiarkawp danin semifinal beiseina an la nei a, chu chuan inelna la nun ṭhatzia a pholang.
Hetah pawh hian point chauh hi a thlirna tur a ni lo a, round hnuhnung pahniha thil thlen dan chu a tingaihnawmtu tak a ni. BVT hian match hnuhnung pahnihah semifinal khelh inbeisei Electric Veng leh Chawnpui FC chu an point mamawh lai takin an hneh.
Hei chauh hi a ni lo, pasarihna dinhmun hauhtu Ramhlun North pawhin an match hnuhnung berah Mizoram Police 'kim' an hneh ve bawk a. Eng team nge chhe ber tih hriatthiam a har tawh a, tla thei dinhmuna ding BVT leh Ramhlun North ten tlak an hlauh tak tak avangin semifinal an thleng pha lo a nih pawhin team dang tibuai thei tur chuan point an hlawhchhuah ngei a rinawm bawk.
A ngaihnawm zel!
Chanmari FC-in match hnuhnung bera Electric Veng 2-0 a an hneh avangin semifinal inum boruak a nun belh bawk. CFC hian goal hnih an khung avangin 'away goal rule' hmangin EFC aiin an dinhmun a ṭha zawk chiah a, point inang an hmu a nih chuan Chawngthansanga hote hi dah san tur a ni.
Chutihrualin he inkhelah hian red card panga zetin an hmuh avangin team pahnih dinhmun a nghawng dawn. Electric Veng captain Isaac Vanlalpeka chu hrem vangin Aizawl FC nen a khel thei dawn lo.
Intihbuainaa inhnamhnawih EFC player Vanlalhmangaiha leh C. Zonunmawia te chu AFC bakah Mizoram Police an hmachhawn thei dawn lo. Chanmari FC lamin player pawimawh Lalmuanzova leh C. Lalrosanga te chu Ramhlun North leh Bethlehem Vengthlang te nen an khel dawn lo.
Chanmari leh Electric Veng ang thoin Aizawl FC-in buaina an nei a, Gift Raikhan hote hian tunkar chhung ringawt pawhin match thum an nei a, chesual thei an ni ve tho. I League club dinhmun hi a chhe thei ang bera thlir phei chuan round 13 zawhah paruknaah an awm thei tawh a, semifinal ticket an la nei bik lo.
Mizoram Police pawhin 'kim chungin' training an nei thei lo a, match hnuhnung bera Ramhlun North an hneh loh aṭang khan kim pawh ni se midang chunga leng an ni bik lo tih a lang.