Atletico Madrid-in Dortmund mikhual dawn

Kar hnih liam ta khan Germany-ah Atletico Madrid an mualpho a, Borussia Dortmund lakah 4-0 in an tlawm. Zanin dar 1:30 hian Spanish club-in Wanda Metropolitano-ah Dortmund an mikhual ve thung dawn.

Champions League group A inkhel dangah Thierry Henry-a enkawl Monaco-in zanin dar 11:25 hian Club Brugge an mikhual dawn. Team pahnih hi an intawn hnuhnun berah an inhnehtawk a, chak hmel an la hmuh loh ve ve avangin pathumna niha Europa League khelh theih chu a tak rama an thlen theih sang ber niin a lang.

Sancho leh Dortmund

India ramin FIFA World Cup an thlen khan England player ṭha ber chu Jordan Sancho tiha chhal ngam a ni a, amaherawhchu Dortmund-in group stage chiah khelh an phalsak avangin Sancho hian goal thum khung mah se nomawi chawitu zinga langsar a ni lo.

Sancho hi Manchester City youth system chhuak a ni a, English rawlthar hian kum 2017 khan Germany a pan ngam avangin fak a hlawh. City manager Pep Guardiola chuan, "Sancho hi cham turin kan duh a, amaherawhchu amah berin chhuah a duh avangin kan dang thei lo," tiin duh loh ni loin duh lai a nih thu a sawi.

Tun season aṭangin Sancho rawn vulin league-ah goal li leh assist vawi ruk a nei tawh a, Champions League-ah assist leh goal khat ve ve a nei tawh a, a mi ngaihsan Marcos Reus-a hnuaiah player ṭha zawkah a inchher chho zel. Dortmund-in Bundesliga leh Champions League-ah hmahruaitu an ni ve ve a, Sancho hi player pawimawh an ni pha a ni.

Atletico lam ve thung

Atletico player pawimawh Diego Godin leh Diego Costa te Pathiannia training-naah an la tel lo a, player pahnih hi Inrinnia Leganes nen 1-1 an inhnehtawk ṭumin an khel tawh lo bawk.

La Liga club tan a awlsam dawn lo a, group hmahruaitu ni tur chuan chak ṭul bawk. Chutihrualin an hnuaia awm Monaco leh club Brugge ten point khat ve ve chauh an la hmuh avangin knockout stage luh hrim hrim erawh a harsa lo ang.