Novak Djokovic chuan US Open 2018 final-ah Juan Martin del Potro a hneh a, a vawi 14 nan Grand Slam nomawi a chawi. Serbian tlangval hian Pete Sampras record (14 titles) a nih rual chiah - major title lak hnem lamah Roger Federer (20) leh Rafael Nadal (17) te chiah tluk loh a nei ta.
Pathianni zan khan Flushing Meadows, New York-ah ruah a sur nasa a, khawvela tennis stadium lian ber Arthur Ashe Stadium chu a chung khuhna hman a ngai. Darkar thum leh minute 15 an inkhelh hnuah Djokovic-a'n 6-3, 7-6, 6-3 in hnehna a chang; US Open bikah hian vawi thum a champion-na a ni, tun kara ranking chhuak tharah chuan parukna aṭangin palinaah a kai chho ang.
Final chu...
Hard court hmang thiam pahnih inkhel an ni a, an tan US Open final thil thar a ni tawh lo bawk. Feet ruk leh inches ruk zeta sang Del Potro-a'n a service neih ṭhat a hmang nghal a, a service game hmasa pathumah point hnih chiah a paih.
Mahse, New York-a final vawi riat khel tawh Djokovic pawhin a service a hloh duh bik lo, 4-3 in hma a hruai hnuah a khingpui service a chhuhsak a, game pawimawh takah 22-shot rally an neih hnuin Del Potro-a forehand na takin net a per, 6-3 in Djokovic-a'n set hmasa ber a la. Argentine tlangvalin tun inelna chhunga set a hloh vawi hnihna chauh a ni.
World number 1 hlui Djokovic erawhin a zawnin set 14 a la a, set hnihnaah pawh 3-1 in hma a hruai zui thei. Mahse, Del Potro-a'n a service a hum bakah chhuhsak vein 3-3 a ni. 6-6 a nih thlengin an chesual duh tawh lo a, tiebreak khelh niin set hnihna bik hi minute 95 an khelh hnuah rilru paukhauh zawk Djokovic bawk a dingchang.
US Open final-ah hian 1949 khan American tlangval Pancho Gonales chu set hmasa pahnih a hloh hnuah a champion let thei a, ani hnuah tho chhuak thei an la awm ngai lo. 2009 champion Del Potro tan hmabak a ko tawh takzet.
Kum 31 mi Djokovic-a'n set thumna bul ṭan fuh lehin 3-1 bawkin hma a hruai leh mah se set hmasa ang thoin 3-3 a ni a. Serbian tlangval insiamṭha nghalin a service a la a, 4-3 in hma a hruai a, break point a hmuh hmang ṭangkai zui turin 24-shot rally an neih hnuah a vannei zawkah a ṭang, champion turin harsatna a tawk zui lo.
Djokovic thawhlehna
2016 French Open champion a nih chiah khan Novak Djokovic-a'n Grand Slam paliah a champion kim chiah a, nomawi lian a kawl zat chu 12 a ni. Serbian tlangval hian eng zat nge a chawi belh ang? tih chu zawhna lian tak a ni nghal.
Amaherawhchu, beisei leh duh ang vekin thil a thleng bik lo. Kiu hliam vangin a buai a, a elpui Federer leh Nadal ten season hmasa kha thununin nomawi lian pali an insem daih, tun season inelna hmasa pahnih Australian Open leh French Open pawh anni pahnih bawk hian an la.
Roland Garros quarterfinal-ah Djokovic a tla a, atan nomawi lian chawi leh beiseina a tlem ta. Mahse, a hun hmasa lam ang bawkin Federer leh Nadal rorelna hnuaiah awm reng a tum bik lo, huaisen takin a tho chhuak; tunah chuan Wimbledon hnuah US Open champion a ni a, a zawna major title pahnih lak hi a nep lo hle.
Hnehna a chan hnuah Djokovic chuan, "Ka naupan lai chuan Sampras inkhel ka en hnemin ka ngaisang thei hle, engtik niah emaw chuan amah anga khelh chhuah ve theih ka beisei. Tunah chuan duhthusam kha a takin a thleng dik ta," tiin a sawi.
Round hmasa pahnihah khaw lum vangin Djokovic-a'n harsatna a nei, third round aṭang erawhin buaina a nei ta lo. Tun tournament match sarih a khelh chhungin set hnih chiah a hloh a, nomawi chawi tur hian set 16 a la zawn thei - season tharah Grand Slam nomawi dang a chawi belh a nih pawhin a mak lo ang.
Novak dahsangtu Del Potro
Juan Martin del Potro-a'n Novak Djokovic hi vawi li a hneh tawh a, ṭum 15 ngawt a ngam lo tawh thung. Argentine tlangvalin a hneh loh player hi a dah sang hle a, khawvelah ani ang chu an tam loh thu a sawi.
US Open hi Grand Slam pali zinga a champion tawhna awmchhun a nih vangin Del Potro-a'n a ngaina a, an ram aṭanga a hlat lutuk loh avangin ṭantu a ngah bawk. Pathianni zan final-ah pawh ṭantu ngah zawk niin, Arthur Ashe Stadium-ah Argentina jersey ha fans an pungkhawm hnem hle.
Kum 29 mi Del Potro chuan, "Ban rek na ka neih lai pawhin ka beidawng ngai lo, a bik takin ka tournament ngainat ber US Open khel tur hi chuan theihtawp ka chhuah ziah, kum kua zet hnuah final ka khel leh a, ka tan chuan a ropui hle. Ka chak emaw chak lo pawh nise mipui thlawpna ka dawn hi theihnghilh theih a ni lo ang.
"Ka theihna zawng zawngin ka khel a, winners vuak tumin ka meng kual reng bawk. Mahse, Nole (Djokovic kohna) kha khawi hmunah pawh a lo awm hman zel, a chang chuan forehand hmangin vanneihna ka zawng a, ka tihsual phah leh ṭhin. Novak kha a che rangin a defence a ṭha em em a, a nihna takah chuan ani ang player ṭha hi chu hneh an har a ni," tiin a sawi.
US Open chhehvel
USTA Billie Jean King National Tennis Center-ah 1978 aṭang khan US Open hi khelh ṭan a ni a, kumin tin August leh September thlaah khelh ṭhin a ni. Kuminah hian court hrang 15-ah khelh niin, Arthur Ashe Stadium leh Louis Armstrong Stadium te chu a hmunpui bik a ni.
Inelna hi Men's Singles, Women's Singles, Men's Doubles, Women's Doubles leh Mixed Doubles hmanga neih a ni a, kum naupang lam tan inelna hran siam a nih bakah, rualbanlo huang a awm bawk. Mipa leh hmeichhe singles champion hian ranking point 2,000 an hmuh bakah Rs 27,52,53,000 an dawng bawk, lawmman hi season hmasa aiin 2.7%-in a sang zawk - khawvel tennis inelna zinga lawmman tamna ber a ni. Pahnihnain Rs 13,40,04,750 dawngin ranking point an hmuh erawh a inlang lo, mipain point 1,200 an hmuh laiin hmeichhia chuan point 1,300 an hmu thung.
US Open 2018 Champion te
Men's Singles Novak Djokovic
Women's Singles Naomi Osaka
Men's Doubles Mike Bryan
Jack Sock
Women's Doubles Ashleigh Barty
CoCo Vandeweghe
Mixed Doubles Bethanie Mattek-Sands
Jamie Murray
