Kan tan chuan chak a pawimawh - Germany boss

Germany chu FIFA World Cup 2018-ah nomawi humhim lo a, mualpho taka first round aṭanga an tlak hnuah hnehna an chang ve ta. Pathianni zan khan Die Mannschaft hian friendly match-ah Peru chu 2-1 in an hneh.

Hoffenheim khelmual Rhein-Neckar-Arena, Sinsheim-a inkhelah mikhual Peru-in minute 22-naa Luis Advincula hmangin hma an hruai a, Germany-in minute 25-naah Julian Brandt hmagin an sut a. Ram tana vawi khat inlanna Hoffenheim player Nico Schulz chuan minute 85-naah chakna goal a khung.

Germany coach Joachim Low chuan, "World Cup result avangin pressure nasa tak kan nei a, hemi hnua hnehna kan chang thei hrim hrim hrim hi a lawmawm hle. Kan chak danah erawh vanneih a tel a, chutihrualin first half-ah chance ṭhahnem tak kan hlah a ni," tiin a sawi.

Low chuan Sinsheim-a inkhel entute bakah UEFA Nations League-a France nena an inhnehtawk ṭuma Munich-a inkhel entute chungah lawmthu a sawi bawk.

Peru an hmachhawn ṭum hian Low chuan France an hmachhawn ṭuma bul ṭantu Manuel Neuer, Mats Hummels, Antonio Rüdiger, Leon Goretzka leh Thomas Muller te aiah Marc-André ter Stegen, Niklas Sule, Ilkay Gundogan bakah goal khungtu pahnih Schulz leh Brandt ten bul an ṭan thung.

Kum 25 mi Schulz chuan, "Kan club khelmual ngeia mahni ram tana khelh chu a nuam danglam hle. Ka goal khung dan erawh vanneih a ni nachungin goal a nihna a bo chuang lo. Team zinga tel tura min pawm nghal thlap anga ka hriat avangin ka lawm a, chutihrualin kan khelh danah erawh hmasawnna tur a tam hle," tiin a sawi.