Team buai Denmark hmaah Wales chak lo

Wales-in Ryan Giggs enkawl­na hnuaia an competitive match hmasa berah Republic of Ireland chu 4-1 ngawtin sawp mah se team talbuai Den­mark lakah an khelh ṭhat an chhun­zawm thei lo a, 2-0 in an tlawm.

Denmark senior player-ten sum chungchangah an ram foot­ball hotute nen an inhmuh­thiam loh avangin Slovakia an hmachhawn duh lo a, third divi­sion, fifth division leh futsal player thlenga koh niin 3-0 in an mualpho.

Wales hmachhawn dawnah erawh Denmark player ten an ram team mualpho nawn an duh tawh bik lo a, Danish FA nen inbiakna neiin Wales hmachhawn an remti a, Ryan Giggs-a enkawl team hi 2-0 in an hneh ta a ni - Christian Erik­sen chuan goal hnih a khung.

Wales tan fiahna!

Giggs leh a nauten Ireland an sawp ṭumin an khel ṭha takzet a, an hmuhnawm hle. Mahse, Pathianni zana an tawn erawh World Cup last 16 inpetkai thei Denmark a ni a, Ireland angin an nem tawh lo.

Ireland lakah kum 17 mi, Chelsea midfielder Ethan Am­padu leh Joe Allen ten midfield an thunun a, goal li ngawt an khung theih nan player ṭangkai an ni. Mahse, Denmark-in Ireland neih loh an nei a, a hming chu Eriksen a ni.

Danish playmaker hi buai­pui a ngai tluan chhuak zak a, Wales-in midfield thunun an harsat. Tottenham Hotspur player hian a phu ang ngeiin minute 32-naah an goal hmahruai a khung ta ngei a, second half-ah penalty hmangin a chhuih lut leh bawk.

A hming chu Eriksen

Denmark-in Eriksen an neih apiangin team danglam an ni ṭhin a, Wales laka goal hnih a khung chiah khan ram tan match 82 a khelha goal 23 a khungna chiah a ni.

Hei mai hi a ni lo, Spurs player pawimawh hi ram tana a inlan hnuhnung match 18-ah goal 20 ngawtah a inrawlh - goal 15 khungin assist vawi nga a nei a, an ram team-in an mamawhna a san zia hmuh hmaih rual a ni lo.

Danish FA leh player-te in­hmuh thiam lohna chung­changah Eriksen hi thawm nei ring ber a ni a, Denmark hian an fachuam hi an ram tana thil ṭha thlen zel tura an duh a nih chuan a tih lungawi dan an zawn vat a ṭul ang.

Hmasawn mamawh Wales

UEFA Nations League-a an match hmasa berah Wales an chak a, match hnihnaah an tlawm zui. Mahse, Manchester United legend Ryan Giggs chuan hnual phah nan hman a duh lo a, hmasawnna tur an ngah thu a sawi.

Giggs chuan, "Match hmasa berah hnehna kan chan avangin mi zawng zawng fak kan hlawh a, kan chak loh avangin kan bibo tur a ni lo. Zirlai ropui tak kawng hrang hrangin kan zir a, Wales ka kaihhruai vawi ngana chauh a ni a, kan hmasawn danah ka lawm hle a ni," tiin a sawi.

Kum 44 mi Giggs hi January 2018 khan Chris Coleman thlak turin Wales chuan an manager atan an lalut a, China an sawp hnuah Uruguay ngam loin Mexico an inhnehtawkpui a, tunah Ireland an sawp hnuin Denmark an ngam lo leh thung.

Bale a hnual lo

Giggs-a'n Denmark lakah captain Ashley Williams a chawlh hahdamtir a, Stoke City defender awm loh hlan hian Gareth Bale chu captain armband hren tir a ni a, a team a chakpui zo lo.

Real Madrid forward chuan, "Penalty kan chhuah hma kha chuan si phurh sut thei dinhmunah kan ding reng a, penalty khan engkim a thlakah ka ngai a, penalty ni turin ka ngai lo bawk. Kan beisei result a ni lo a, mahse zirchhuah tam tak kan nei a ni," a ti.

Minute 63-naa Denmark-in penalty an chawina kha Ethan Ampadu handball vang a ni a, referee chuan Chelsea midfielder hian Viktor Fischer-a ball cross chu a kutin a lo khawihfuhah a ngai a ni.

Inkhel Result
International Friendly
Germany 2 - 1 Peru
UEFA Nations League
League A
France 2 - 1 Netherlands
League B
Ukraine 1 - 0 Slovakia
Denmark 2 - 0 Wales
Africa Cup of Nations Qualification
Madagascar 2 - 2 Senegal
Swaziland 0 - 2 Tunisia
Rwanda 1 - 2 Côte d'Ivoire
Zanin Inkhel Tur
International Friendly
Poland 12:15 AM Republic of Ireland
England 12:30 AM Switzerland
UEFA Nations League
League A
Iceland 12:15 AM Belgium
Spain 12:15 AM Croatia