Stade de France-ah Les Bleus-in champion lawm

France-in FIFA World Cup an champion hnua an rama an inkhel hmasa berah Netherlands 2-1 in an hneh a, Nations League Group A1 hmahruaitu an ni chiah bawk.

Pathianni zan inkhelah hian Les Bleus tan hian Kylian Mbappe leh Olivier Giroud ten Stade de France-ah goal an khung a, Netherlands tan Ryan Babel-a'n a khung ve bawk.

World champion leh Oranje

France coach Didier Deschamps chuan Nations League match hmasa bera Germany hmachhawn tute bawk inkhel bul ṭantuah a hmang.

Player 11 zinga 10 chu World Cup final-a bul ṭantute an ni a, keeper Hugo Lloris a inhliam avangin PSG keeper Alphonse Areola-a'n goal ven hna a thawk.

Netherlands erawh inelna lian pahnih Euro C'ship leh World Cup khel turin an tling zo tawh lo. Oranje hian 2014 WC-ah semifinal an thleng a, penalty shootout-a Argentina hneh lotute aṭangin Jasper Cillessen, Daley Blind leh Georginio Wijnaldum ten bul an la ṭan.

An ram legend Wesley Sneijder chuan kar liam ta khan Robin van Persie, Dirk Kuyt leh Arjen Robben te hnung zuiin ram tan inkhelh a chawlhsan ta bawk.

Goal thum chu

France-in inrintawkna nen bul an ṭan a, Dutch midfielder Quincy Promes tauh sual chu Blaise Matuidi zawnah tla chatin Juventus midfielder ball pek chu yard ruk lek aṭangin Kylian Mbappe-a'n a khung.

World Cup-a goal li khungtu Mbappe-a'n goal hnih khung theihna hun ṭha a hlah a, keeper Jasper Cillessen a chet ṭhat avangin first half-ah goal a lut ve tawh lo.

Second half-ah Netherlands insiamṭhain Georginio Wijnaldum chuan a hun ṭha neih chu goal zawnah a pet lo. Dutch right-back Kenny Tete cross Liverpool winger hlui Babel chuan Benjamin Pavard-a'n veng mah se goal-ah a chantir tho.

A tawpah erawh world champion danglamna a lang a, substitute Benjamin Mendy cross chu Giroud-a'n Liverpool defender manto Virgil van Dijk venna hnuaiah mawi zetin a khung. Chelsea striker hian FIFA World Cup-a an champion-na kawngah goal a khung lo a, a record duhawm lo tak hi nuam zawka champion an lawm theih nan a titawp.

French forward Giroud hian ram tan goal 32 a khungna chiah a ni a, a chungah David Trezeguet (34 goals), Michel Platini (41) leh Thierry Henry (51) te chiah an awm.

Champion lawm

France coach Didier Deschamps chuan, "Champion kan lawm theih nan kan chak hi a pawimawh takzet a ni," tiin hnehna an chan chu lawmawm a tih thu a sawi a, Stade de France-ah champion lawm zuiin inhliam captain Lloris pawh a tel a ni.

Netherlands coach Ronald Koeman chuan, "France kan hmachhawn tih theihnghilh loh a ṭha a, chutihrualin hun pawimawhah tihsual kan neih avangin point hmuh theihna tur hun ṭha kan hloh," tiin a sawi.

UEFA Nations League
UEFA-in friendly match an duh khawp lo a, Nations League an duang chhuak.
UEFA hnuaia ram 55 chu an ranking milin league paliah ṭhendarh an ni.
League A-ah ram 12 an awm a, group paliah an ṭhendarh. Group hming hi A1, A2, A3 leh A4-ah ṭhendarh a ni.
League B (12 team), C (15 team), D (16 team) te pawh group A ang thoin group paliah vek ṭhendarh a ni bawk.
Group tina a hniam ber ṭheuh hi anmahni awmna league hnuaiah chiah an tla ang a, a sang ber ṭheuh an awmna chungah chiah an kai chho ang.
League A bikah hian group tina a sang ber ṭheuh hian champion an zawng dawn. Nakkum June thla hian semifinal leh final hi khelh tur a ni.
UEFA Nations League hian UEFA Euro 2020 khel tur atan pawh nghawng a nei a, league tin hian quota pakhat ṭheuh an nei dawn. Qualifier bik hrim hrim erawh a hrana kalpui tur a ni a, ram 55 chu group 10-ah ṭhendarh an ni ang. Group tin aṭangin pahnih ṭheuh an tling dawn. Euro C'ship-ah hian team 24 an inlan dawn a, Nations League kaltlangin team pali hmun ruak a awm dawn tihna a ni.