Madagascar Stadium-ah mi 40 inhliam

Pathianni zan Africa Cup of Nations 2019 qualification-a Madagascar leh Senegal an inkhel a, team pahnih inhmachhawn hma hian stadium luh inchuha mipui an inpawng nek avangin he thu buatsaih thleng hian mi pakhat a thi a, mi 40-in hliam an tuar bawk.

Madagascar khawpui Antananarivo-a damdawi inah te hliam ho hi en­kawl an ni a, an zinga pahnih chu an dinhmun a ṭha lo hle. French radio station RFI-in a puan dan chuan stadium-ah hian gate pakhat chauh hawn a ni a, hawn a nih rual hian mipui an innek buai ta a ni.

He inkhel en tura kal zinga mi Rivo Rabe­risaona chuan, "Zing dar ruk aṭangin inkhel en tur hian gate bulah hian kan awm tawh a, nek buai zingah tel mah ila bag ka ah hlauh avangin ka bag ah hian min veng a ni," a ti a, fan dang pakhat chuan match lianthama stadium gate pakhat chiah hawn a ni chu a hriatthiam loh thu a sawi ve bawk.

Team pahnih intawnna hmun Mahamasina Stadium hi khelmual te a ni hran lo a, mipui 30,000 ngawt lenna niin stadium gate pakhat chiah hawn a ni hian chhiatna a thlen ta ni berin a lang.

Inkhel erawh ruahman ang hian kaltlangpui tho a ni a, Liverpool forward Sadio Mane hoa khel Senegal-in Moussa Konate leh Keita Balde goal khung hmangin vawi hnih ngawt hma hruai mah se Paulin Voavy leh Kalidou Koulibaly own goal hmangin mualneituin an chhanglet ve ve a, 2-2 in an ṭin.

Africa khawmual­puiah hian stadium-a in­nek buai avanga chhiatna hi a lo thleng fo tawh a, hei hi inkhel thununtu lamin mipui an thunun tawk ṭhin loh vang a ni tlangpui bawk.

Nikumah ringawt pawh khan vawi hnih ngawt innek buai avanga chhiatna a thleng a, February 2017 khan An­gola-ah stadium-a mipui innek buai avangin mi 17 an thi a, July 2017 khan Malawi-ah mi pariat ngawtin an nunna an chan tawh bawk a, heng zinga pasarih chu naupang an ni.