San Marino-ah Dovizioso a chak ber
Pathianni zana tlan zawh tak San Marino MotoGP-ah Andrea Dovizioso chuan hnehna a chang. Ducati rider hi tun season chhungin bike intlansiakna sang berah hian vawi thum a chakna chiah a ni a, a hnungah hian champion lai leh hmahruaitu ni mek Marc Marquez a thleng thung.
Misano World Circuit Marco Simoncelli-ah pole position aṭanga tlan chhuak Jorge Lorenzo a vanduai, Ducati bike khalhtu hi lap hnih chauh tlan tur a awm tawh tihin pahnihnaah a tlan mek a, vanduai thlak takin a chesual hlauh.
Ducati rider pahnih tlan ṭhat ṭumah kum 32 mi Dovizioso hian minute 42 leh second 05.426 chhungin a thleng a, pahnihna Marquez nen an inthlau lutuk lo - Honda rider nen an inkarah second 2.822 chiah a awm. Anni pahnih hnungah hian Cal Crutchlow a thleng a, pathumna nih hi LCR Honda team tan chanchin ṭha a ni.
World champion vawi li ni tawh Marquez-a'n rider championship lama hmahruaitu a nihna a sawhnghet zel a, amah hnaih bertu Dovizioso aiin point 67 in a sang fal zawk. San Marino an tlan hma kha chuan Valentino Rossi chu pahnihna a ni mek a, mahse Italian rider hi pasarihnaah a thlen hram avangin a pumpuiah pathumna niin, tlan tluan thei lo Lorenzo chu palinaah a awm.
Dovizioso a lawm
Italian rider Dovizioso tan hnehna chan hi a hlu bik, kum 11 chhungin Misano tlankawngah Ducati-in hnehna an chan lehna hmasa ber a ni a, an intlansiakna tlankawng hi Dovizioso pianna Forlimpopoli, Italy aṭangin 60km vel chauha hla a ni.
Championship lama pathumna luahtu Dovizioso chuan, "Hnehna ka chan vangin ka lawm a, a bik takin helai hmunah ngei Marquez ka hneh hian ka lawmna a ti zual. Inelna a la tawp lo a, season chawhnu lamah hian theihtawp ka chhuah chhunzawm zel ang," tiin a sawi.
Season hmasaa pahnihna Dovizioso hian tlarhnihna aṭangin intlansiak bul a ṭan a, lap ruknaah Ducati teammate Lorezno tlan pelin a tawp thlengin a hawikir leh tawh lo. Season bul ṭanna Qatar bakah thla hmasaa an tlan zawh tak Czech MotoGP-ah te hnehna a lo chang tawh bawk.
Marquez a zam lo
Kum 25 chauh la ni mah se Marquez-a'n MoroGP nomawi vawi li a chawi tawh a, a vawi nga nana champion leh turin a dinhmun a sawhnghet leh tawh hle. Spanish rider chuan, "Nomawi lam panin kawng dik kan zawh mek, intlansiak harsa tak a ni. Ducati nena inel hi chu khawvel dang daih ang mai a ni a, inbuatsaihna nei ṭha hle mah ila a takah chuan a awlsam lo hle ṭhin," tiin a sawi.
Intlansiak thlirkirzuiin Marquez chuan, "A nihna takah chuan pahnihna nih tumin ka bei a ni a, ka hma a tlan Jorge a tluk avang khan pawi ka ti hle. Ani nen khan kan inum na hle a, inel ni mah ila vanduai bik an awm ṭhin hi chu a pawi ka ti. Rider dang pawhin kan tawh theih vek a ni," tiin a sawi.
MotoGP season kal laiah intlansiak vawi 18 a awm dawn a, chung zinga 12 chu an tlan tawh. September 23 hian Aragon tlan kawngah Spanish Grand Prix an tlan leh ang.
San Marino MotoGP Results
# Rider Ram Ream Time
1 Andrea Dovizioso Ita Ducati 42mins 05.426secs
2 Marc Marquez Spa Honda +2.822secs
3 Cal Crutchlow GB LCR Honda +7.269secs
4 Alex Rins Spa Suzuki +14.687secs
5 Maverick Vinales Spa Yamaha +16.016secs
6 Dani Pedrosa Spa Honda +17.408secs
7 Valentino Rossi Ita Yamaha +19.086secs
8 Andrea Iannone Ita Suzuki +21.804secs
9 Alvaro Bautista Spa Ducati +23.919secs
10 Johann Zarco Fra Yamaha +27.559secs
Championship Standings :
# Rider Ram Team Points
1 Marc Marquez Spa Honda 221
2 Andrea Dovizioso Ita Ducati 154
3 Valentino Rossi Ita Yamaha 151
4 Jorge Lorenzo Spa Ducati 130
5 Maverick Vinales Spa Yamaha 124
6 Cal Crutchlow GB Honda 119
7 Johann Zarco Fra Yamaha 110
8 Danilo Petrucci Ita Ducati 110
9 Andrea Iannone Ita Suzuki 92
10 Alex Rins Spa Suzuki 79