SAFF Cup Maldives ngamtu India-in semifinal lut

SAFF Championship khelh mekah India chuan an match hnihnaah Pathianni zan khan Maldives chu 2-0 in an hneh a, inkhel hmasa zawkah Sri Lanka an lo ngam tawh bawk avangin semifinal an lut.

India tan hian Nikhil Poojary leh Manvir Singh ten goal khat ve ve an khung a, Maldives lamin a chhanletna tur an neih loh avangin an tlawm a, semifinal erawh an lut ve tho.

Blue Tigers tan Mizo tlangval pahnih Jerry Lalrinzuala leh Lallianzuala Chhangte te an inlan a, Bethlehem Veng tlangval Jerry-a'n minute 90 a khelh laiin Sri Lanka laka goal khungtu Lianzuala hi second half-ah lakchhuah a ni thung.

SAFF hnuaiah ram pasarih an awm a, India hi Group B-ah Maldives leh Sri Lanka nen awmin a sang pahnih hian semifinal an lut. Maldives leh Sri Lanka hian India hi 2-0 a an hneh loh ve ve bakah an pahnih inkhelah an inhnehtawk a, semifinal lut tur hi ṭhum vawr hmangin zawn a ni!

Group A-ah Bhutan-in point an hmu lo a, Nepal, Pakistan leh Bangladesh ten point ruk ṭheuh hmu mah se goal difference-a ṭha pahnih Nepal leh Pakistan hian semifinal an lut.

Semifinal hi Nilainiah khelh tur niin Nepal hi Maldives nen tlai dar 3:30-ah an inkhel ang a, India leh Pakistan hi zan dar 7:00-ah an intawng thung ang.

Team Dinhmun
Group A
# Team Pld W D L GF GA GD Pts
1 Nepal 3 2 0 1 7 2 5 6
2 Pakistan 3 2 0 1 5 2 3 6
3 Bangladesh 3 2 0 1 3 2 1 6
4 Bhutan 3 0 0 3 0 9 -9 0
Group B
# Team Pld W D L GF GA GD Pts
1 India 2 2 0 0 4 0 4 6
2 Maldives 2 0 1 1 0 2 -2 1
3 Sri Lanka 2 0 1 1 0 2 -2 1
Semifinal Fixture
September 12, Nilaini
Nepal 3:30 PM Maldives
India 7:00 PM Pakistan
*Inkhel hi D Sports-ah live-in a en theih ang.