Bike intlansiakna sang leh ngaihhlut ber MotoGP champion lai Marc Marquez chuan a hma lama tlan Valentino Rossi a nek tluk avangin hrem a tawk, hnehna changtu Cal Crutchlow chanchin aia sawi zui hlawh chu Pathianni zana Marquez chet dan a ni.
Argentina MotoGP-ah Cal Crutchlow chu lap 25 chu minute 40 leh second 36.342 chhunga thlengin pakhatna a ni a, Honda rider hian intlansiak pahnihah point 38 hmuin hmahruaitu a ni. Britain tlangval zingah Barry Sheene (1979) tih lohah chuan MotoGP rider championship-a hmahruaitu ni leh thei hmasa ber a ni hial.
A bilh a tho lo
Intlansiak ṭan a nih hmain ruah a sur a, Autodromo Termas de Rio Hondo tlangkawng a huh vangin rider ten kawng huh a hman chi tyre nen bul an ṭan a, beisei aia kawng a ro chak avangin intlansiak ti hmuhnawm zualtu a nih phah hlauh thung.
World champion vawi li ni tawh Marquez-a'n track luh danah dan a bawhchhiat nghal avangin a hnung aṭanga bul ṭantir a ni. Spanish rider hian ṭum dang ang bawkin a elpui dangte lehpelh a harsat lo, a dinhmun pawh a sawhnghet chho hman hle.
Amaherawhchu, Turn 13-ah a hma lama tlan lai Rossi lehpelh a tumna lamah a nek fuh a, Italian rider hi tlankawng sira phul huhah a tlu. Rossi hi tho lehin tlan zui mah se, 19-na bak a ni phak tawh lo.
Kum 25 mi Marquez hi Rossi laka a chet dan vangin 30-second penalty pek a ni a, intlansiak a zawh hnua a dinhmun chu 18-na a ni; rider championship-ah point a hmuh belh lo. ArgentinaGP hi Honda tan hmun ṭha a ni lo, Marquez-a teammate Dani Pedrosa pawh intlansiak a tlan chuak zo lo, rider chesual pathum zinga chhuak hmasa ber a ni.
Rossi a lawm lo
MotoGp rider ropui pahnih Valentino Rossi leh Marc Marquez te hi ropui ber nih inchuh a inel tak an ni a, a thiam leh ṭha fal bik an nih avangin tun ṭuma an boruak pawh hi midang inkara thil thleng nen chuan khaikhin chi a ni hauh lo ang.
World champion vawi sarih ni tawh Rossi chuan, "Kei chu ka dinhmun a ṭha, mah se Marquez hian tun hma aṭang tawhin a elpuite zahna a nei ngai lo a, kan infiamna hi a ti zahawm lo vek a ni. Intlansiakah chuan bike thunun zawh loh vanga midang tihpalh chu thil thleng thei a ni. Amaherawhchu, tun ṭuma thil thleng chu chutiang a ni ve lo," tiin a elpui Marquez chet dan a dem hle.
Intlansiak a zawh hnuah Marquez hian ngaihdam dil tumin Yamaha team awmna a pan a, mah se Yamaha hna thawkte chuan kum 39 mi Rossi hmuh an phal lo thung. Yamaha MotoGP boss Lin Jarvis chuan, "Rossi hian Marquez bula tlan a hlau tawh ang," ti hialin a sawi.
Thiamthu
Intlansiakah chuan chetsual palh chang a tam a, a bik takin bike intlansiakah hian chetsualna a tam hle. Marquez chuan a chet danah thil atthlak a awm loh thu a sawi ve thung. Season hmasa khan qualifier zawng zawng nen Marquez hi vawi 27 zet a chelsual a ni.
Marquez chuan, "Tun season chu risk lak tlem ka tum a, kum hmasa lama ka chetsualna tam tak pumpelh ka duh vang a ni. Kawng sir lamah zawk ka awm a, tlankawng ro tawh mah se a hnawng lai ka rap fuh. Hmalam en chungin brake ka thlah a, ani nen khan kan intai palh ta a ni. A tlu ka hmu a, ngaihdam dil pawh ka duh," tiin thil thleng chungchang a sawi.
ArgentinaGP a thli thleng vang hian thawnthu hlui pakhat a rawn thar leh ta. Kum 2015 October thla khan Malaysian Grand Prix tlan a ni a, hetah hian Rossi-a'n Marquez hi a tlawh tlu tawh. Rossi hi pathumnaah thleng mah se Marquez hian intlansiak a tlan tluan ve theih loh phah tawh a ni.
