Heavy Metal leh Klopp

Liverpool boss Jurgen Klopp-a'n, "Ball chan tam leh pass tam tak neih hi ka ngaih danah chuan rimawi muang mar raiha a ri ang mai hi a ni a, a thawm a na lo. Kei chu heavy metal ngainatu ka ni a, a ring thei ang ber ka duh ṭhin," tiin a naute a khelhtir ṭhin dan chu heavy metal music nen a tehkhin a, City nena an inkhelh hmasakah a hlawhtlinpui.

Heavy metal-ah chuan a ring thei ang berin music an play a, guitar ri ṭeng mawi karah bass guitar a ri a, drums ri dup dupin a lo chawm bawk. Klopp-a enkawlna hnuaiah mawi taka guitar ri a kal angin Mo Salah, Sadio Mane leh Roberto Firmino ten football mawina an pholang a, bass guitar ang maiin Alex Oxlade-Chamberlain, Jordan Henderson leh James Milner ten a mawina an belhchhah a, tlarhnungah nghet taka drums a ri dup dup angin Van Dijk leh Dejan Lovren te ho an lo ding ṭhin.

Chu heavy metal football mawina chu Anfield-a Liverpool leh City inkhel entuten an hmu a, mit a tlai a ni. Anfield-ah City player-te chawlh hahdamna hun pek an ni lo a, Reds-in ball an hloh apiangin engti kawng zawng pawha neihlet tumin an tlan nghal ṭhin. City nena an intawn hmasakah khan Liverpool hian interception vawi 20 an nei a, City-in vawi kua. Liverpool-in City ball chhuhsak an tumnaah 37% an hlawhtling a, City hlawhtlinzat erawh 24% a ni.

Hrilhfiah dan awlsam ber chu hei hi a ni. Liverpool-in City laka goal thum an khung zingah khan City khelmual chanve lama anmahni ball khalh phei pakhatmah a awm lo - gegenpressing leh counter pressing aṭanga chhuak vek a ni. Chu chu kan sawi tak heavy metal-in a ken tel a ni a, Liverpool player tlan tamna, ball chuhlet tumna leh thawhrimnain City player-a chetsualtir zara chhuak vek a ni.

Heavy metal football hmuh duhin khawvelin Etihad Stadium a hawi ang - he football kalphung dang turin Manchester City aia duhthlan tur erawh an tam chuang lo.