Arsenal tan Danny Welbeck

Season tawp lama harh tharna chang Arsenal chuan Danny Welbeck-a goal hnih hmangin an mikhual Southampton 3-2 in an hneh. Gunners hian point 54 hmuin parukna an nih chhunzawm a, palina Tottenham chu point 13 in an phak lo.

Emirates Stadium-a inkhelah Pierre-Emerick Aubameyang-a'n a goal khung a chhunzawm zel, a club thar tan goal ruk a khung der tawh. Saints goal hnih hi Shane Long leh Charlie Austin te khung niin, hun tawp hma minute kua lek a awm tawhah Welbeck-a'n chakna goal a tauh lut.

Gunners hian vawi hnih hma an hruai hnuah tlarhnung pawp vangin an in insuttir, mah se bench aṭanga rawn lut Jack Wilshere-a'n inkhel boruak siam nungin hun tawp lamah chakna goal an sual chhuak hram.

England international Jack Wilshere-a'n a ruk­in Jack Stephens na tak­in a pawt a, Saints defen­der thinrim insum zo lo­­in Wilsher hi nemin hnawh­­chhuah a nih phah. Southampton lamin free­kick an pet tur lo tibuaitu Mohamed Elneny pawh hnawh­chhuah niin, player 10 ni chungin hun tawp an hmang.

UCL ticket
Arsene Wenger-a'n season thara Champions League khelh ngei a duh a, a kalkawng awlsam ber nia lang chu Europa League champion nih a ni. Gunners hian quarterfinal an lut tawh a, Ningani zan hian CSKA Moscow nen second leg an khel dawn.

Arsenal manager Wenger-a'n CSKA Mos­cow an hmachhawn hmasak ṭuma player pasarih ngawt a siksawi a, keeper Petr Cech leh defender Shkodran Mus­tafi te chuan inkhel bul an ṭan thung. Russia-ah a neih ṭhar ber nena thawh­chhuah a tum vang a ni.

Chak lo zawk Sou­thamp­ton chu 18-naah awmin tla thei dinhmunah an ding mek. Manager Mauricio Pellegrino thlaktu Mark Hughes-a'n hartharna a la thlen thei lo, an match hnuhnung 19 aṭangin vawi khat chiah hnehna an chang a, an league match hnuhnung pahnih aṭangin goal ruk ngawt an chhuah.