Champions League khel lo tur Chelsea?

Chelsea-in Premier League an champion zawh season-ah nomawi an ngaihtuah pha lo a, palina ni phak tur pawhin vanneihna an mamawh tawh.

Pathianni zana Antonio Conte hote leh West Ham 1-1 in an inhnehtawk a, an match hnuhnung pahnihah point khat chauh an hmuh avangin season tharah Champions League an khelh theihna kawng a zim ta hle.

Stamford Bridge-ah chuan
Minute 36-naah Cesar Azpilicueta chuan Alvaro Morata siam sak chu Chelsea hmanhruaina ni turin a khung a, Spanish defender hian a goal khung hi Nilainia thi kum 61 mi England midfielder hlui Ray Wilkins tan a hlan.

Inkhelh ṭan hma pawhin Chelsea player hlui Wilkins-a hriatrengna hun hi neih a ni a, player-te'n armband dum an hreng bawk.

Wilkins sunna hun a nih avangin Blues tana ni hriatreng tlak ni mah se West Ham lamin point thum pek an tum bik lo. Hammers substitute Javier Hernandez chuan minute 73-naah an siphurh a sut a, 1-1 in inkhel a tawp.

Season khaikhawmna
Chelsea manager Antonio Conte chuan, "Kan inkhelah hi tun season khaikhawmnaah a ngaih theih. Goal khung theihna chance ṭhahnem tak kan insiam a, kan hmang ṭangkai lo. Chutihrualin kan lamah vawi hnih chiah an pet a, goal khat a lut. Hei hi tun season kan hman dan a ni," tiin an vanduai thu a sawi.

An tlarhma chhanin Conte chuan, "Morata goal hnih khung chu offside vangin pawm a ni lo a, inrintawkna a hloh lo. Chutihrualin Hazard, Willian leh Morata te khung turin goal chance kan siam hnem. Ka sawi nawn leh duh chu kan vanduai a, hei hi kan season khaikhawmna a ni," tiin a sawi.