Manchester City an la tlawm lo

Liverpool-in 3-0 a Manchester City an hneh hnu lawka City boss Pep Guardiola thusawi chu, "A harsa dawn tih kan hria a, mah se beisei erawh kan la nei," tih hi a ni a, Reds manager Jurgen Klopp pawhin, "Half time ang chauh a la ni," a ti ve bawk.

Champions League quarterfinal first leg-ah Liverpool hian Anfield-ah Manchester City chu 3-0 in an sawp a, zanin dar 12:15-ah Etihad Stadium an pan ve thung dawn. City-in si thum phur sa mah se Pep-a sawi angin City an la tlawm lo a, beisei an la nei.

Manager luhlul leh huaisen Pep-a'n a tawp thlengin chak beiseina nen a naute a khelhtir ngei ang a, hriat tel atana ṭha erawh Liverpool technical area-a ding tur Klopp hi vawi 13-a'n intawna Pep-a team enkawl vawi sarih hnehtu a ni tih hi.

Lal thar chu
'Egyptian King' tiin Mohamed Salah chu hminglem pek a ni a, kum 25 mi forward hi Liverpool fan-ten an atchilh rawn a ni ber mai. Mahse, tun season-a match 42-a khelha goal 38 khungtu hi Manchester City nen an intawn hmasakah hliam vangin lakchhuah a ni a, he thu ziah a nih thleng hian a dinhmun a la chiang lo.

Liverpool-in kartawp Merseyside derby an khelhah Salah a la inlan lo a, Klopp chuan, "Everton lakah khan chhawr chi a la ni lo hrim hrim a, a hriselna dinhmun sawi reng turin minute nga danah ka en lo bawk, " a ti a, "City laka inlan tur erawhin mi zawng zawngin an beisei," a ti zui.

Everton lakah Liverpool an hmuhnawm tawk lo a, goal khung loa an inhnehtawkna inkhelah Salah awm loh a hriat. City laka goal khungtu Salah hian Etihad Stadium-a mawi thei dawn lo a nih chuan City dinhmun a ṭha sawt dawn tihna a ni.

Aguero a dam tawh
Mo Salah chhawr thei lo dinhmuna Liverpool an din laiin City erawhin first leg-a an chhawr thei loh Sergio Agüero an chhawr thei tawh dawn thung a, Liverpool fans tan hriat a nawm loh rualin City fans erawh an nui ang.

Anfield-ah Aguero tel loin tlarhmaah Gabriel Jesus te ho an la 'nau' deuh tih a lang a, Argentine striker hona hnuaiah chuan City tlarhma an hlauhawm sawt ang–pound maktaduai 75 man Virgil van Dijk te hoin hna an ngah sawt dawn. Dutch defender chuan, "Game hautak a ni dawn a, mah se ka nghakhlel tawh a ni," a ti thung a, a zam lo.

City tan chak tur chuan goal li khung piahlamah goal chhuah miah loh a ngai dawn. Hei vang hian club captain Vincent Kompany erawh a hnual lo a, "Goal nga khung a ngai a nih chuan kan khung mai ang," a ti. Etihad-ah Liverpool hi 5-0 in an lo hneh tawh tih a hai lo.