Roma-in Barca leh Messi mikhual dawn
Nou Camp-ah Roma player-in goal thum an khung a, amaherawhchu goal hnih hi an lama lut a nih avangin Barcelona lakah 4-1 in an chak lo. Zanin dar 12:15 hian Stadio Olimpico-ah Roma hian Barcelona an mikhual dawn a, away goal rule hmanga chak tur pawhin 3-0 a chak a ngaih avangin Italian club hmabak a hautak hle.
Giallorossi (Roma sawina) hian kartawp khan an mualah Fiorentina chu 2-0 in an hneh lo a, Catalan club erawhin Leganes 3-1 in an hneh a, Lionel Messi-a'n hattrick a siam. First leg leh an match hnuhnung ber thlirin Roma hian thawhchhuah aiin goal an chhuah belh a rinawm zawk.
Risk lak a ngai
Roma coach Eusebio Di Francesco chuan, "Mi tam tak chuan khelh chhan kan nei tawh lo tiin an sawi a, kei chuan khelh chhan neih ka duh. Beiseina kan nei tur a ni a, tumna kan neih a ṭul bawk. Inkhel tura kan chhuah hunah chak tumna kan nei lo a nih chuan engmah kan thleng dawn lo. Chuvangin 'risk' kan lak a ṭul a ni," tiin beiseina nena khelh a ṭul tur thu a sawi.
Roma hian Barcelona an tum zawhah Pathianni zan dar 12:15 hian Lazio an hmachhawn dawn a, team pahnih hi point 60 hmuin Serie A-ah pathumna leh palina an ni a, an inkhel tur hi a pawimawh hle. Di Francesco chuan, "Kan rilru puthmang kan lantir hun chiah a ni. Barcelona lakah khan goal li chhuah tur kan ni lo a, Fiorentina lakah pawh 2-0 tur a ni lo, amaherawhchu a thleng tawh chin hi chu kan pawm mai a ṭul a, kan hmabak hi ṭha taka kan khelh a ṭul a ni," a ti.
Barca an lian
Barcelona-in match 31-ah point 79 an hmu tawh a, Madrid Derby-ah Atletico Madrid leh Real Madrid te an inhnehtawk bawk avangin Catalan club hian anmahni hnaih bertu Atletico aiin point 11-in an hmu tam zawk.
La Liga-ah Catalan club hian match 38 chhung hneh loh an tawng tawh lo a, Champions League lamah pawh an record ṭha hi chhunzawm zel an tum ang. Barca hian first leg-ah 4-1 in an hneh a, kum 2015 khan 6-1 in an mualah an hneh tawh bawk.
Amaherawhchu Barca hi Stadio Olimpico a an lenluh hnuhnun berah an chak zo lo a, 1-1 in an inhnehtawk. Kum 2002-a an lenluhah phei chuan Roma-in Catalan club hi 3-0 in an hneh a, goal khungtu zingah tuna Sevilla coach Vincenzo Montella pawh a la tel a, Lionel Messi tel hma a ni thung.
Tunah chuan Barca-in Messi an nei tawh a, Luis Suárez te an kawl bawk avangin Roma tan goal khung ringawt ngaihtuah theih a ni lo a, goal venhim ngaihtuah tel a ṭul bawk.