Germany hnehin Spain an tlang

Tun kar tawp khan Davis Cup quarterfinal khelh a ni a, world num­ber 1 Rafael Nadal chuan Germany hnehin semifinal an lut. Spain hian final lut tur chuan France an paltlang leh a ngai ang.

Zirtawpni zan aṭangin inelna neih ṭan a ni a, Inrinni zana doubles match an khelh zawh hnuin Germany lamin 2-1 in hma an hruai. Mahse, Pathianni zan khan singles match khelh chhunzawm a ni a, Spain lamin 3-2 in an lehthal.

Dinhmun hnuaihnung zawkah an din laiin Spain tan Nadal rawn ding chhuakin, Grand Slam vawi 16 champion tawh hian world number 5 Alexander Zverev chu 6-1, 6-4, 6-4 in a hneh a, best of five series khelh turah 2-2 chiah a ni.

January thlaa khelh zawh tak Australian Open hnuah Nadal hi a inlan lehna hmasa ber a ni a, a hliam a dam tawh tih lan nan court chhungah a tal na nghal hle.

Singles match dang khelh zui niin, inkhel inhnehtawk leh hmuh­nawm takah David Ferrer chuan Philipp Kohl­schreiber chu 7-6 (7-1), 3-6, 7-6 (7-4), 4-6 7-5 in a hneh ve leh bawk a ni.

Ram leh ram mipa tennis team hmanga inelna semifinal hi Sep­tember 14-16 chhunga khelh leh tur a ni a, semi­final lehlamah Croatia leh United States te an inkhel ve bawk ang.