Daredevils aia Lal zawk Kings XI

Indian Premier League khelh mekah Pathianni zan khan inkhel pahnih a awm a, inkhel hmasa zawkah Kings XI Punjab chuan wicket rukin Delhi Daredevils an hneh.

Delhi tan captain Gautam Gambhir che ṭha mah se Kings XI tan KL Rahaul leh Karun Nair ten half century siam ve vein an team hi hnehna an chanpui.

Kolkata Knight Riders-in chak result nen IPL bul an ṭan a, an match hmasa berah an mikhual Royal Challengers Bangalore chu wicket liin an hneh. KKR tan run 50 vaw chhuaktu Sunil Narine chu player langsar a ni.

Kings XI an Lal
Punjab Cricket Association Stadium, Mohali-ah Kings XI Punjab-in Delhi Daredevils an mikhual a, mikhual team an bat hmasa zawk.

Delhi tan opener Colin Munro chu run li chiah siamin out mah se captain Gautam Gambhir-a'n run 55 a rawn siam avangin over 20-ah run 166 erawh an tlin ta tho a, wicket sarih an hloh.

Punjab club-in opener KL Rahul hmangin bul an ṭan ṭha nghal a, wicketkeeper batsman hian ball 16-ah run 51 a siam–Karun Nair (50 runs) leh a tawp thlenga dam pahnih David Miller (24 runs) leh Marcus Stoinis (22 runs)-te an rawn chet ṭhat bawk avangin over 18.5-ah an target umphain wicket li chiah an hloh a, hnehna an chang.

KKR an ṭha
Kolkata khawpuiah Royal Challengers Bangalore an lenglut a, Bangalore club hi an bat hmasa. IPL-a batting line-up nei ṭha ber pawl ang hiala ngaih team tan Brendon McCullum chuan run 43 a siam nghal a, captain Virat Kohli (31), AB de Villiers (44) leh Mandeep Singh (37) te pangngai taka an bat bawk avangin over 20-ah run 176 an siam a, wicket sarih an hloh.

KKR-in target pangngai tak um mah se mahni mualah tlawm an duh lo. Opener Sunil Narine-a'n ball 19 lekah run 50 a rawn siam a, Dinesh Karthik (35) leh Nitish Rana (34) ten ṭha taka rawn bat bawkin over 18.5 lekah an target an umpha a, wicket ruk lek hloh chungin hnehna an chang.

Nizan khan Sunrisers Hydera-bad leh Rajasthan Royals an inkhel a, he thu buatsaih lai hian an result kan hre hman lo.