Griezmann-a'n Real lakah Atletico a chhanhim

Cristiano Ronaldo-a'n Madrid derby-ah Real Madrid tan volley goal mah se Atletico Madrid-in Antoine Griezmann hmangin an chhanglet a, Madrid derby-ah chak zawk an awm lo.

Atletico Madrid-in hnehna chang zo lo mah se Barcelona hnuaiah awmin pahnihna dinhmun an luah chhunzawm zel a, match sarih khelh tur la awma Catalan club an phak lohna zat hi point 11 a la ni.

Real Madrid erawh pathumna aṭangin palinaah an tla thla a, an hnuai chiaha awm Valencia-in Real chak zawh loh zanah 1-0 a Espanyol an hneh avangin pathumnaah an invawrhkai.

Ronaldo bawk
Madrid derby-in season dang angin hlutna a nei tawk lo a, team pahnihin hnehna chang pawh ni se Barcelona chu um phak rual loh deuhthawa an invawrhkai tawh avangin table lamah nghawng a nei na lutuk lo.

Mahse, Madrid club pahnih inhuatna erawh a pangngai reng a la nih miau avangin boruak sang lo a ni lo a, inkhelh ṭantirh aṭangin team pahnihin goal khung tumin an innawr tawn zak zak a, Real kan hmu hnem zawk.

Chawlhlawk hman a nih hnuah goal kan hmu ta nge nge a, Gareth Bale ball siamsak chu Ronaldo-a'n ṭha zetin a volley lut–Real hian goal khungna chance dang pawh an nei a, mah se Marco Asensio leh Marcelo ten an hun ṭha neihah post an pet per.

Atletico tan Griezmann
Santiago Bernabeu-ah Ronaldo goal khung lawmin Real fans an lam a, mah se an hlim au thawm pawh a reh fel hmain Griezmann a inlar ve lehnghal. French forward hian minute thum hnu lawkah an si phurh sutna goal hi a khung a, Vitolo pet Keylor Navas-a'n a dan per chu a khung.

Griezmann-a'n a chal zawnah L sign siam chungin a goal khung a lawm a, France international goal khung lawm dan hian zawhna tam tak a hring nghal–video game lar tak Fortnite lama an lam dan a ni a, footballer zingah he lam dan hmanga goal khung lawm hi a lar chak hle.

Kum 25 mi forward chuan inkhel thlir kir nghalin, "Hnehna chan tuma khel ni mah ila point kan hlawhchhuah avangin kan lawm a ni," a ti a, goal chhuah hmasa zawk an nih avangin draw result-a an lawm thu a sawi.

Hahdam rawh Ronaldo!
Real tan Ronaldo-a'n goal a khung chiah khan match 10 chhung a zawna goal a khungna a ni a, hetih chhung hian goal 20 a khung hman. Mahse, Madrid derby boruak sangah Ronaldo khelh tluantir a ni lo a, minute 64-naah Karim Benzema chuan a thlak.

Madrid boss Zinedine Zidane chuan Ronaldo a lakchhuah chhan sawifiahin, "Inkhel hautak kan hmachhawn reng a, Ronaldo hian chawlh hahdam a mamawh a ni. Player fing tak a ni a, chawlh a mamawh hun chu amah hian a hre em em. Kan chawlh hahdamtir hnu lawkah ṭha takin a khel ṭhin bawk," a ti.

Real Madrid hian Champions League quarterfinal first leg-ah Juventus chu Ronaldo goal hnih khung chhawr ṭangkaiin 3-0 in an sawp a, Nilaini zan dar 12:15-ah second leg an khel leh dawn.

Simeone a inchhuang
Madrid derby-ah Atletico chak zo lo mah se coach Diego Simeone erawhin lawmna tur a hmu tho. Argentine coach chuan, "Team ṭha chungchuang Madrid leh Barcelona te nen kan inel phak reng hi a ropui a ni.

"Team ṭha Juventus leh PSG te pawhin anni pahnih hmachhawn hi chu hautak an ti em em a, kum heti zat chhung anni el phaka kan awm reng hi Atletico fan-te pawh an lawm tur a ni," a ti.

Real coach Zidane pawh a lunghnur bik chuang lo. French manager chuan, "Kan khelh dan enin chak kan phu tih a lang a, ka lawm a ni. Point thum kan hlawhchhuah loh avangin a pawi ka ti a, chutihrualin tlawm thei dinhmunah kan ding ve tho," tiin lawmna tur a zawng.