Mizoram Premier League champion Aizawl FC-in I League-a an result ṭhat tawk loh vangin head coach Manuel Retamero an ban a, a aia an lakluh chu Mohun Bagan coach hlui Jahar Das a ni. Spanish coach Manuel hi tun season I League-a coach ban pahnihna a ni a, Goan club Salgaocar-in match lia point khat chauh hmuh vangin Scottish coach Malky Thomson an lo ban tawh bawk.
Mizoram club zinga I League khel hmasa ber Aizawl FC chuan Pathianni zan khan Facebook-a an official page-ah an head coach an ban thu hi an ziak.
Tukin zing aṭang khan Aizawl FC-in coaching staff thar hnuaiah training an nei ṭan a, February 13 hian RG Stadium, Mualpuiah North East Derby khel turin Shillong Lajong an mikhual ang.
Result ṭha zawk?
I League-ah Aizawl FC hian match ruk an khel tawh a, point li hlawh chhuakin an hnuaiah anmahni aia match khata khel tlem DSK Shivajians (4 Pts) leh Salgaocar
(1 Pt) te chiah an awm.
Aizawl FC team director Hmingthan-sanga Zadeng chuan, "Retamero hi coach thawkrim tak a ni a, a hnuaiah hian hmasawnna hmuh tur pawh a tam hle. Amaherawhchu I League khel zel tur chuan tun aia result ṭha zawk hi kan neih a ṭul a, team chhunga phurna pe turin coach thlak hi a ṭul a ni. Retamero aiah Jahar Das a lut ang a , assistant coach William Koso-a'n a hnai ngai a chelh ang," tiin Vanglaini palai a hrilh.
I League thlenpuitu coach K. Malsawm-kima chungchang sawi zuiin Hmingthana chuan, "Mala hi Aizawl FC chhungkaw zingah a la tel reng a, first team coaching staff-ah pawh telh a ni ang. I League-ah hian technical area-ah pasarih a ṭhut theih a, tunah hian panga kan ṭhu ṭhin. Coach, assistant coach leh physio-te hi awm ngei ngei tur an ni a, anni bakah hian manager, fitness coach, analyst, goalkeeping coach leh a dangte an la ṭhu thei bawk. Manager tan hian certificate neih kher a ngai lo a, assistant manager tan pawh a ngai lo. AIFF hnenah technical area-a Mala awm theihna turin dilna kan thehlut ang," tiin a sawi.
Mala hian season liamta khan Aizawl FC hi MPL3-ah a champion pui a, I League-ah a thlen pui bawk. Tun season ṭantirah Mala hian I Day Football-ah Aizawl FC a champion pui zui a, I League enkawl turin AFC A Licence leh a tlukpui tal neih a ngaih avangin UEFA Pro Licence nei Manuel hi a aiawh tura lakluh a ni.
Document aṭanga thlir chuan Mala aiin AFC A Licence nei Jahar Das a pawimawh zawk dawn a, a taka pawimawh tur zawk erawh hunin a la hril ang. Bengali coach Das hian hun rei tak Mohun Bagan Academy-ah head coach hna a chelh tawh a, National Football League hun laiin Mohun Bagan senior team chu thla thum vel a lo enkawl tawh bawk.
Retamero thukhawchang
Spanish coach Manuel Retamero-a'n Mizoram nuam a ti a, Aizawl FC enkawl zel a châk avangin club thutlukna chu hriatthiam har a ti hle.
MPL4-a Aizawl FC champion puitu coach Retamero chuan, "Ka room-ah mi pakhatin lehkha a rawn dah a, head coach aṭangin min ban tih ka hre chiah. An thutlukna tur chungchang pawh sawihona awm miah loa min ban tawp hi mak ka ti a, ka thawhrimna nena thlirin hetianga ban hi chu ka phu bik lo a sin," tiin Vanglaini palai a hrilh.
A hnathawh chungchang sawiin Spanish coach chuan, "I League-a kan chet dan hi ṭha lo anga an hriat chuan statistics an en lo a ni. Ka kahruaina hnuaiah Aizawl FC hian hun rei lote chhungin kawng tam takah hma an sawn a, amaherawhchu result duhthusam nei tur chuan Harry Potter ka ni bik lo," tiin thawnthu bu lar tak JK Rowling-i ziah Harry Potter-a a changtupa te ang a nih ngawt loh chuan an club beiseina tihhlawhtlin a theih loh thu a sawi.
Supporter chungchang sawiin Manuel chuan, "Fans tam takin min rawn bia a, ka khelhtir dana an lungawi thu leh min ui thute min rawn hrilh a, an chungah ka lawm takzet. Anni hian ka rilru hrehawmna min hnem takzet a ni," a ti.
Contract chhehvel
Manuel hian Aizawl FC-ah kum thum daih contract a ziak a, an ban dan chung-changah Spanish coach agent Ze Ondoua Eddy a lungawi lo hle.
Ze Ondoua Eddy chuan, "Football hi hna dang ang tho a ni a, duh duha inban theih a ni lo. Coach-in tihsual a neih chauhin club-in an ban thei a, Manuel hian tihsual a nei lo. Aizawl FC banna lehkha nen hian thuneitu sang zawk hnenah kan zualko ang," tiin Vanglaini palai a hrilh.
Manuel-a agent chuan sawi chhun-zawmin, "Aizawl FC-in contract an bawhchhe zawk a, an inbiakremnaah chuan Manuel hi a duh ang player lak an phalsak. Amaherawhchu an sawi angin an awm lo a, Manuel hian training-naah I League atana an player lak tharte a hmu ve chauh a, club hian player an lak dawn hian an rawn lo. An draw emaw an chak vang emaw-a a bonus dawn tur ang an pe lo bawk," tiin a lungawi loh thu a sawi.
Aizawl FC secretary Vanlalnghaka Chhawnchhek chuan, "Kan ban chhan hi result chauh a ni lo a, vawi khat aia tam warning kan pe tawh. Contract chung-changah buaina tur kan nei lo a; amaherawhchu a ban thu kan hrilh hian thla khat tal a liam a ṭul avangin thla khatin a hlawh hi kan pek chuang a ngai dawn a ni," tiin tihsual an neih loh thu Vanglaini palai a hrilh thung.
Facebook-a Aizawl FC Thuchhuak
Aizawl FC-in coaching team thar nei dawn
Hero I-league khelh mekah Aizawl FC-in match ruk an khel tawh a, chung zingah chuan home match vawi thum a tel. Statistics aṭanga thlirin match ruk khelh tawhah beiseiawm viau mah se goal kua kan chhuah a, goal li chiah kan khung.
Kan match zawng zawngah ball possession-ah kan ṭha vek a, hei bakah hian match ruk khelhah vawi 58 zet corner kick hmu mah ila corner kick aṭangin goal kan khung lo. Uluk taka kan coach game plan leh player a chhawr dan thlirin club chuan zah tak chunga Manuel Retamero Fraile thlah a, a aiah club chhunga Head of Youth Development Programme hna thawk mek leh tawnhriat ngah Jahar Das bakah Mizoram coach of the year ni lai K. Malsawmkima te lakluh kan ti tlu ta a ni. Coaching staff dang thlak an ni lo a, team director Hmingthansanga Zadeng chu team kaihruaitu a ni ang.
Aizawl FC general secretary Vanlalnghaka Chhawnchhek chuan, "Head coach Manuel Retamero Fraile contract kan tihtawp hmain uluk takin a result kan thlir a, chumi aṭanga thlutlukna siam chu kan ni. Manuel-a chungah kan lawm a, a kal zelna turah duhsakna kan hlan. Tin, club-in team chhung boruak kan ngai pawimawh a, hemi kawngah hian coaching staff tharah hmasawnna kan neih ngei kan beisei," tiin a sawi.
