Vawiinah MPL5 khel tur chiang dawn
Mizoram Premier League Season 5 Qualifier chu vawiin hian Lammualah khelh zawh a ni dawn a, season thara Mizoram chhunga football league sang bera khel tur a chiang ang.
Chhun dar 12:00-ah Aizawl khaw pawn club pahnih Cham-phai United leh Project Veng FC, Kolasib te an inkhel ang a, tlai dar 2:00-ah Aizawl DFA club Chhinga Veng FC leh Ramhlun North FC te an inhmachhawn leh ang.
MPL-ah Kolasib?
Project Veng coach Joseph Zoremsanga chuan, "Player inhliam chhawr theih loh kan nei a, amaherawhchu kan squad a chhah tawk avangin kan buai phah lo ang. Match hmasa lama khel lo Mizoram junior team tana feh chhuak winger Ramhlunchhunga leh defender Vanlalfawna te kan hmang thei dawn a, hei hian team a ti chak sawt ang. Attacking football kan khel dawn a, point thum kan hlawhchhuah ngei ka ring. Kan match hnuhnung bera kan mamawh chu Kolasib khawchhuak ṭawiawmna a ni," tiin a inringtawk hle.
Kolasib hian MPL5 Quali-fier-ah goal hnih an khung a, goal pahnih hi C. Lalnuntluanga freekick ve ve a ni. Champhai United an hmachhawn hunah hian Project Veng boss chuan open play aṭanga goal khung ngei an tum a, hemi kawngah hian MPL-a tawnhriat nei
ṭha C. Tluanga bakah Ricky Zonunmawia leh Lalrintluanga (Tuka) te an pawimawh ang.
Project Veng hmabak erawh a awlsam dawn lo, team dinhmun chhe bera ngaih Champhai United coach NL Thanga chuan, "Point hmu loin Champhaia kir kan tum lo," tiin Vanglaini palai a hrilh. Veteran coach thusawi hi a thleng dik a nih chuan Project Veng tan MPL thlir liam mai a ṭul ang.
Champhai United hian match hnuhnung bera Chhinga Veng an tum ṭumin first half-ah 2-0 in hma an hruai a, player lamin coach thusawi an zawm tawk loh avangin second half-ah goal thum an chhuah. Champhai hian Kolasib club hi an hneh dawn a nih chuan coach thutlukna an pawm tlan a ṭul tawh ang.
Inkhel hmuhnawm
Chawhnu lama Chhinga Veng leh Ramhlun North inkhel tur hi local football tui pha chin tan chuan ngaihven loh theih loh a ni. Aizawl DFA club pahnih inkhelh zawhah hian MPL5 khel tur a chiang dawn.
Chhinga Veng tan MPL5 khel turin point khat hmuh a tawk a, amaherawhchu minute 90 chhung Ramhlun North chelh erawh hna hautak a ni. League an intawn hmasak ṭumin Chhinga Veng leh Ramhlun North te 1-1 in an inhnehtawk a, season tawpa champion Chhinga Veng hi siphurh suttu zawk an ni. An intawn hnuhnun berah David Lalrinchhana goal hmangin Ramhlun North-in Chhinga Veng chu 1-0 in an hneh.
Chhinga Veng manager Lal-thanzama Vanchhawng chuan, "Point khat chiah kan mamawh tawh a, pressure nei lo zawk kan ni. Inrintawkna nen attacking football khel chungin kan point hmuh hmabak hi hlawhchuah kan tum ang," tiin a sawi.
Chhinga Veng hian Cham-phai United an hmachhawn
ṭuma hnawhchhuah Hming-thanmawia an chhawr thei dawn lo a, practice hnu-hnung berah inhliam vangin player pawimawh winger Lalthlamuana leh defender Lalrochhara te an practice thei lo bawk.
Ramhlun North manager Sangtluanga chuan, "A ṭha ber kan beiseiin kan inpuahchah a, Chhinga Veng hi kan hneh thei tih kan chiang. League-ah kan hneh tawh avangin player-te pawh hian an zuam viau a, chutihrualin zuam sual hi a awm thei bawk," tiin chak theih a inbeisei thu a sawi.
Hriattur Pawimawh
* Qualifier-a pakhatnain MPL5 an khel ang.
* Pahnihnain MPL4-a pasarihna Luangmual FC nen MPL5 Playoff an khel ang.
* Team pahnih emaw aia tam point hmuh zat a inan chuan head to head en hmasak ber tur a ni.
* Chhinga Veng, Ramhlun North leh Project Veng te pakhatna an la ni thei vek.
* Champhai United-in pahnihna niin playoff an la khel thei bawk.
* Team pali hian MPL5 khel thei turin beiseina an la nei vek.
Vawiin Inkhel Tur
12:00 Noon Champhai United Vs Project Veng FC, Kolasib
02:00 PM Chhinga Veng FC Vs Ramhlun North FC
Thlirna Tawi
February 2, Thawhlehni
Project Veng, Kolasib 1 - 2 Chhinga Veng
PVFC : C. Lalnuntluanga 58'
CVFC : Vanlalhriata 12', 81'(P)
Champhai United 1 - 2 Ramhlun North
CUFC : Zonunsanga 90+3'(P)
RNFC : Jerry Lalrinzuala 8'; David Lalrinchhana 83'
February 5, Zirtawpni
Chhinga Veng 3 - 2 Champhai
CVFC : Lalrinhlua 63'; Vanlallawma 68'; Lalhmunsiama 74'
CUFC : David Lalnunmawia 28'; Zonunsanga 39'
Ramhlun North 0 - 1 Project Veng, Kolasib
PVFC : C. Lalnuntluanga 30'
Team Dinhmun
# Team Pld W D L GF GA GD Pts
1 Chhinga Veng 2 2 0 0 5 3 2 6
2 Project Veng 2 1 0 1 2 2 0 3
3 Ramhlun North 2 1 0 1 2 2 0 3
4 Champhai United 2 0 0 2 3 5 -2 0