Barcelona-in hma an hruai zel Real beiseina a la tawp lo
Spanish La Liga-ah Barce-lona-in an hmahruaina an chhawm nung zel a, Pathianni tlai khan Levante chu khual-mualah 2-0 in an hneh.
Real Madrid beiseina a la chuai bik lo, Zinedine Zidane-a enkawl team hian khualmualah Granada CF chu 2-1 in an hneh a, pathumna dinhmun luahin Atletico Madrid leh Barcelona an um zel.
Valencia manager Gary Neville-a phur a rit zual zel. Pa-thianni zan khan Real Betis lakah a team chu 1-0 in a tlawmpui a, league match-ah chak hmel a la hmu lo.
Barca tan Suarez
Luis Enrique-a'n league match 100-a khelh tlinnaah a team a chakpui a, Luis Suarez-a'n tun season league match-a a goal 20-na a khung bawk.
Inkhel ṭan aṭanga minute 21-na lekah Barcelona-in goal an khung nghal a, goal khungtu erawh Levante defender David Navarro niin Jordi Alba cross ball chu an lamah a ti lut.
Beisei loh Levante an hlauh--awm chhunzawm a, Jose Luis Morales-a'n post a pet per hnuah Giuseppe Rossi goal shot chu Claudio Bravo-a'n
ṭha takin a dang bawk.
Minute 92-naah Barca tan Luis Suarez a inlar a, Liverpool striker hlui hian tun season-a match 34-a inlana a goal 36-na a khungin Barcelona an chak.
Real vannei
Granada khelmualah Real Madrid an lenglut a, hun tawp dawna Luka Modric goal ropui hmangin an chak hram.
Inkhel ṭan aṭanga minute 30-na lekah Real-in goal an khung a, Dani Carvajal-a ball cross
ṭha tak chu Karim Benzema-a'n goal-ah a chantir. French striker tan tun season-a a goal 23-na a ni a, match hnuhnung paruka goal riat a khungna a ni bawk.
Tun hnaia goal khung har-sat lo tak Real-in goal an khung chhunzawm dawn emaw tih lai-in mualneituin Zidane-a nau-te an barakhaih a, minute 60-naah Yousseff El-Arabi chuan an si phurh sutna goal a khung.
Hun tawp nan minute nga chiah a awm tawh tihin Real fan-te hahdamna tur Modric-a'n a thlen tir a, Croatian midfielder hian goal ropui khungin Real chu 2-1 in hnehna a chanpui.
Neville a eng a chuai
Valencia manager Gary Ne-ville-a'n pressure ngah tak chungin khualmualah Real Betis a hmachhawn a, 1-0 in a naute a tlawmpui.
Copa del Rey-a Barcelona laka 7-0 a an mualpho avanga Valencia legend Santiago Canizares-a'n a hna aṭanga bang tura a lo tih tawh manager tan Spain-ah ni a eng thei lo.
Inkhela goal awmchhun hi second half-a Ruben Castro-a khung a ni a, an match hnu-hnung 13-a Betis-in hnehna an chan vawi khatna a nih avangin Neville-a dinhmun hi a derthawng lehzual lo thei lo.
La Liga match kua a hma-chhawn tawha vawi li a naute tlawmpui a, vawi nga an khingpuite inhnehtawkpuitu Neville erawh a la zam lo.
Manchester United defender hlui chuan, "Valencia ka pan khan thla nga chhungin ka hna-thawh chungchang hi an sawi nghal dawn tih ka sawi a, mahse kar ruk chhung lekin ka hnathawh ṭhat leh ṭhat lohah bukna lung khai nghal a ni," tiin fan-te chu dawhtheihna nei loah a puh.