Serie A Juventus leh Napoli in um zel

Italian Serie A khelh mekah Ju-ventus leh Napoli-te chu champion tumin an inum chho zel a, Pathianni zan khan team pahnih hian an khingpui lakah hnehna an chang.

Champion lai Juventus tan Juan Cuadrado leh Paulo Dybala ten second half-ah goal an khung a, Turin club hian league match-ah a zawnin vawi 14 chhung hnehna an chang ta.

Goal hmahruai khungtu Chelsea aṭanga loan-a Juve zawmtu winger Cuadrado hian tun season-ah goal thum a khung tawh a, goal hnihna khungtu Dybala hian tun season-ah league goal 14 a khung tawh bawk.

Juventus leh Napoli te hi karleh Inrinni zan khian an inhmachhawn dawn a, he inkhel result hian champion tur a hril thui hle tawh ang. Team pahnihte inthlauhna hi point hnih chauh a ni.

Kar leh inkhel tur thlir nghalin Juve manager Massimiliano Allegri chuan, "Maurizio Sarri leh a naute hian season duhawm tak an hmang mek a, anni lo mikhual hi a harsa dawn. Mahse keini chu team puitling kan nih tawh avangin inkhel hautak hmachhawn tur hian kan inpeih e," a ti.

Napoli beiseina nung zel

Serie A-ah Juventus-in season thum chhung hnehsawh taka ro an rel hnuah tun season-ah Napoli nen an inel tawk rih hle.

Napoli hian Gonzalo Higuain goal khat khung hmangin Capri lakah 1-0 in hnehna an chang a, league match riat chhung hnehna an chang zawn ve ta.

Italian Serie A top scorer nilai Higuain hian a club tan inelna hrang hrangah goal 26 a khung tling tawh a ni. Real Madird-a hmun chang lo Argentina international hi Italy-ah a par vul mek.

League hmahruaitu Napoli hian point 56 an hmu tawh a, an hnuai chiaha mi pa-hnihna Juve hian point 54 an hmu thung.

Napoli fan-te chuan Capri an hneh zan hian kar hmasa a Lazio nen an inkhelh ṭuma chi inthliarna rawng kaia auh nawmnah Kalidou Koulibaly lama an ṭan zia pholanna banner an tar chuak. Senegal centre back auh nawmnah a nih avang hian inkhel tihtawp a lo ngai tawh a ni.

Inkhel dang

Inkhel dangah Inter Milan chu 3-1 zetin chak lo zawkah ṭang hman mah se goal hnih an khung belh theih avangin Verona lakah point khat an hlawh chhuak hram. Roberto Mancini naute hian point 45 hmuin table-ah palina dinhmun an la luah chhunzawm ve zel.

AC Milan pawh a zawnin vawi riat chhung an tlawm lo ve ta a, season bul ṭan fuh lo mah se an insiam ṭha chho mek. Amaherawhchu, Pathianni zan khan Udinese nen 1-1 in an inhnehtawk thung a, point khatah an lungawi a ṭul.