Hoffenheim an che fuh thei lo

Bundesliga league kal mekah Hoffenheim an che fuh thei lo tluang zel a, Pathianni zan khan an mikhual Darmstadt lakah 2-0 in an tlawm.

Hoffenheim goal-keeper Oliver Baumann chet fuh loh vangin Darm-stadt chuan captain Aytac Sulu hmangin minute 33-naah goal hmahruai a khung a, defender Slo-bodan Rajkovic chuan an goal hnihna a khung bawk.

German league sang ber Bundesliga-ah hian club 18 an inel a, an inkhelh kual vek hnua point hmu hniam pahnih chu division hniamah an tla thla dawn.

Tun dinhmunah league match 20 khelh tawh aṭangin Hoffenheim hian point 14 chiah an la hlawh chhuak a, table-ah 17-na dinhmun an luah. An hnuai chiaha awm Hannover nen an point hmuh zat a intluk a, an chung chiaha awm Werder Bremen chu point ngain an phak lo thung.