Blues nena inbiakna nei lo John Terry

Season tawp ruala Chelsea a chhuahsan tur thu sawitu John Terry chuan club nen inbiakna engmah an la neih loh thu a sawi.

Chelsea captain hian contract thar zawrh a nih loh avangin Stamford Bridge a chhuahsan tur thu hi a lo sawi tawh a, he thu a sawi hnu lawk hian Blues manager Guus Hiddink chuan Terry leh club chu an inbiak thuai a rin thu a lo sawi tawh a ni.

Mahse, English defender chuan, "Engmah a la inthlak danglam lo. Chelsea chhuahsan hi ka duh lo tih chiang takin ka sawi tawh a, ka tan chuan a harsa a ni. Mahse, club hi a pawimawh ber tur a ni a, tun thleng hi chuan club nen inbiakna kan nei lo," a ti.

Kum 35-a upa defender chuan, "Chelsea-a ka hun tawnte hi ka theihnghilh mai mai tawh dawn lo a, keimahah hian an cham reng tawh dawn a ni," tiin Stamford Bridge a chhuahsan ngei hmel hle.

Chelsea-a chhuahsan tur thu a sawi rualin Terry hi Qatar club Al Arabi, Major League Soccer leh Chinese Super League-te nen sawizawm a hlawh leh der tawh a ni.