Ligue 1 PSG tan Ibrahimovic leh Di Maria

Pathianni zan French Ligue 1 inkhelah champion tawha ngaih Paris St-Germain chuan khualmualah Marseille lakah 2-1 in hnehna an chang.

Marseille khelmuala inkhel-ah Zlatan Ibrahimovic chuan inkhel ṭan aṭanga minute hnihna lekah goal hmahruai a khung a, second half-ah Angel di Maria chuan chakna goal a khung bawk.

Sweden international Ibra-hi-mo-vic goal khung hi 'Le Classique ' tia a hming an vuah Marseille leh PSG inhmachawnna inkhela kum 1985 hnua goal lut rang ber a ni. Ibra hian tun season-ah a club tan goal 21 a khung tling ta chiah.

Nikum November thla hnua la tlawm leh lo Marseille an nep bik lo, minute 25-naah Remy Cabella chuan an si phurh a rawn sut. Mahse, minute 71-naah Manchester United winger hlui Di Maria chuan an chakna goal a khung zui leh a ni.

Laurent Blanc chuan, "Marseille fan-te chuan point an hlawh chhuak lo kha pawi an ti viau mai thei, mahse keini pawh khan point thum hmuh phu khawpin kan khel ṭha ve thawkhat. Team ṭha tak kan hma-chhawn a, inkhel hautak tak a ni bawk. Point thum hlu bik a ni," tiin a sawi.

PSG hian league table-ah point 24 zetin hma an hruai fal tawh a, French Ligue 1-ah hneh loh nei lo a champion ni thei turin match 13 chiah an hmabak tawh.