MBBA League Final Hollow BSSP vs Chawnpui VR4

Vawiin chawhnu dar 2 hian Mizoram Basketball Association hnuaia Divi-sion I te inelna MBBA League final match hmasa ber chu Hawla Indoor Stadium Republic Vengthlangah khelh a ni dawn a, Hollow BSSP leh Chawnpui VR4 an inhmachhawn dawn a ni.

MBBA League Divi-sion I inelnaah hian club paruk an inel a, league round-a an inkhelh kual vek hnuah a tawpah a sang paliin semifinal an inhlangkai.

Hollow BSSP hian league round-ah Chawnpui VR4 hi point khat chauh-in an lo hneh tawh. Amah-erawhchu, Division I final hi match thum khelh tur a nih avangin inlehthal theihna hun a awm dawn. Match hniha hnehna chang thei zawk zawk chu champion an ni ang.

Division I inelna hi a pawimawh em em a, champion team hian Mizorama basketball inelna sang ber Mizoram Super League an khel thei nghal dawn a, pahnihna hian playoff an khel thung dawn a ni.

Team ṭha pahnih

Hollow BSSP hian league match nga an khelh aṭangin Ramhlun SC an hneh lo tih loh chu an chak fai vek a, semifinal-ah Dawrpui Vengthar SC lakah 93-75 in hnehna an chang zui bawk.

Chawnpui VR4 hian league match vawi nga an khelh aṭangin vawi thum hnehna an chang a, Ramhlun leh vawiin an hmachhawn tur BSSP hi an hneh lo tawh a ni. Mahse, semifinal-ah VR4 hian Ramhlun hi 87-77 in an hneh let thei a ni.

Eng nge an sawi?

Chawnpui VR4 secre-tary Robert Laldinpuia chuan, "Kan intawn hmasak khan kan vanduai zawk a, tun ṭumah erawh result a danglam tawh ka beisei. Inkhel hautak hmachhawn turin kan inpeih e," a ti.

Sports and Youth Ser-vices coach, tuna Hollow BSSP enkawltu Samuel Lalthlamuana chuan, "Team ṭha ve ve inkhel tur kan ni a, VR4 hian palian ngah mah se an guard lam an pan deuh avangin an chak lohna laiah kan bei ang," tiin Vanglaini palai hnenah chak an tum dan a sawi.

Vawiin chawhma lam hian Division II semifinal khelh tur a ni bawk dawn a ni.