Mizoram sorkar thutlukna anga October 16, 2020 aṭanga sikul luh hnu leh sikul luh kaihhnawihah November 11, Nilaini thlenga swab sample endik aṭangin zirlai 101 leh mi dang 12-in Covid-19 an kái tih hmuh chhuah a ni a; zirlai leh sikula thawk ni lo, a kaihhnawiha kái chháwng mi eng emaw zat an awm bawk.
Covid-19 test result ni tina sorkar thuchhuahin a tarlan aṭanga a lan danin, October 15 aṭanga November 11 thleng khan Mizoram tualchhunga hripui inkài chhâwng zingah zirlai 101, sikula zirtirtu panga, hostel warden pakhat leh staff paruk, an vaiin mi 113 an awm a; chu'ng zinga mi 28 chu natna lang chhuak (symptom nei) an ni.
Zirlai, zirtirtu leh sikula thawktu, sikul aṭanga Covid-19 kái tarlan zat hi IPR department-in Covid-19 swab sample test result a tichhuaha a tarlan chian chin a ni a; sikula thawk tih tarlan loh, Covid-19 veite kalna sikula thawk si an awm nuala hriat a ni bawk.
Sikul hawn kaihhawiha Covid-19 positive zirlai 101-te chu mipa 58 leh hmeichhia 43 an ni a; zirtirtu panga, hostel warden pakhat leh thawktu dang paruk an awm bawk a, an vaiin mi 113 an ni. Mi 113 zingah hian Covid-19 symptom nei mi 28 an awm a, mi 85-in symptom an nei lo.
School Education minister Lalchhandama Ralte hoa October 12, 2020-a Consultative Committee ṭhukhawm chuan MBSE hnuaia exam tur pawl 10 leh 12 zirlaite chu October 16, 2020 (Zirtawpni) aṭangin regular class kal turin an rél a; secondary school chin chung lama pawl 9 leh 11 zirlaite erawh chu regular class kal loin, anmahni duh thlannain sikulah zirtirtute zawh duh an neihte zâwt tura kal phalsak an ni thung.
Sorkar hotute thutlukna ang chuan, high school leh higher secondary school zirlaite chu an duh chuan hostel-a awm phalsak an ni a, mahse, Covid-19 lakah an fihlîm ngei a ni tih finfiahna an neih a ngai. Hostel-a lut tur, an luh hmaa swab sample endiktir a, hripui kai tih hmuh chhuah tâk pawh an awm nual a ni.
Mizorama hripui inkài darh dan IPR department-in a tarlan dan chuan, October 15, 2020 khan Chhinga Vengah sikul (sikul hming tarlan loh) zirtirtu mipa pakhat chu sikul kài ṭan a nih dawn avangin RAT hmangin a sample endik a ni a, Covid-19 positive a ni tih hmuh chhuah niin, symptom erawh a nei lo. Hei hi sikul academic session 2020-21 chhunga sikul luh kaihhnawiha hripui vei hriat theih hmasa ber a ni.
October 16 khan Lawngtlai district-ah HSS zirlai mipa leh hmeichhia, kum 18 ve ve, hostel-a awm tur leh zirna avanga hmun danga chhuak turte chu RAT hmanga endiknaah Covid-19 positive an ni tih hmuh a ni a, symptom an nei lo. October 17-ah St. Joseph's HSS, Aizawla zirlai mipa pahnih chu ZMC-ah hripui vei an ni tih hmuh leh a ni bawk.
