Thlai man tisangtute minister-in a dem

Cooperation minister C Lalrinsanga hoin nimin khan tun hnaia thlai man sang vanga mipuite'n harsatna an tawh sutkian dan tur sawiho a ni a; ruahmanna siam turin Vegetable Supply Chain Committee an ruat. Minister chuan uchuak taka thlai man tisangtute a dem.

Minister C Lalrinsanga chuan, ramri buai vanga Mizorama lirthei lut tur hun eng emaw chen dan a nih karah leh Covid-19 léng kara loneitute'n man tlâwm taka an thlai thar an hralh laia khârchhâwngte'n man to taka thlai man an tisang chu a dem thu a sawi a, "Lockdown hmasa lamah veng leh khaw ṭhenkhat ṭhahnemngaite'n an thlaite a thlàwna an semte kha Mizo zia dik tak a ni," a ti a; tun hnaia inkhàrkhip laia thlai man sang ta erawh chu Mizo zia kalsanna a nih thu a sawi.

Thlai man to ta thut chu sorkarin pawi a tih thu sawiin C Lalrinsanga chuan, "Loneitute leh consumer-te insuihzawmna ṭha zawk ruahman a ni ang a, mipui harsatna sukiang turin state danga an kalpui tawh - Aapna Mandi, Rythu Bazar-te Mizorama kalpui a nih theih nan zir chian a ni ang," a ti a; intodelh turin sorkar department hrang hrang ṭanho a pawimawh thu a sawi bawk.

Meeting-ah hian, tun hnaia thlai man sang thut chungchangah a ṭul anga ruahmanna siam turin Vegetable Supply Chain Committee ruat ni se, an ti a; thlai hralh chungchanga kalphung thar tur MIZOFED leh TRIFED nen ngaihtuah leh ni se, an ti.

Minister hi MLA pahnih - Cooperative Development Board vice chairman H Biakzaua leh Horticulture Development Board vice chairman Prof. F Lalnunmawia ten an ṭawiawm a; Horticulture, Trade & Commerce, Agriculture leh FCSCA department aiawhte an tel a ni.