KHAWTHLIR

State Referral Hospital-ah nimin khan Covid-19 vei mi pathum dah luh an ni a, tun dinhmunah SRH-ah Covid-19 vei mi 47 enkawl mek an ni. SRH-ZMC tarlan danin, mi 47 zinga paruk chu ICU-ah an awm a, dah luh thar leh sawn chhuah pakhat ve ve an awm a; ventilator hmangin mi pali enkawl niin, pahnih dang chu oxygen pek mek an ni. SRH-a hripui vei enkawl mek zingah kum 60 chung lam 18 leh kum 14 hnuai lam pakhat an awm a ni.

National Water Award 2019 chu November 11-12, 2020 khan Vigyan Bhawan, New Delhi-ah video (virtual) hmanga sem a ni a; India hmarchhak bikah khaw mala tuihna humhalh ṭha ber, Best Village Panchayat atan Serchhip district-a Léng khua thlan a ni. Ailawng, Mamit district chu pahnihna a ni bawk. Award hi Ministry of Jal Shakti buatsaih a ni a, Mizoram sorkar chu Special Category-ah Best State atan thlan a ni.

Lunglei Luangmual Bial PYD (NEI)-te chuan nimin khan Lunglei Civil Hospital tan thisen unit 25 an pe a, a petute mipa 21 leh hmeichhia pali an ni.

Fisheries department chuan kum 2020 chhungin sangha notê (Indian Major Carp) 5,47,500 an thar chhuak tawh. Sorkar thuchhuah tarlan danin, sangha notête chu Fisheries department farm, Lengpui leh Ṭamdil Fish Seed Farm-a thar a ni a, Zobawk Fish Seed Farm-ah Mizoram lui sangha - Nghahrah tuitira enkawl mek a ni bawk.

Khawzawl Quick Response Team (QRT) member-te chu nimin khan Khawzawl Hospital meeting hall-ah first aid pek dan zirtir an ni. He hun hi medical superintendent Dr Frank Harris chuan a kaihruai a, medical officer Dr Albert Lalhminghlua'n thupui hrang hrang hmangin thil pawimawhte a zirtir a ni.