Mamawh aia tam chhêk lo turin Central YMA-in mipui an ngen

Central YMA chuan thuchhuah siamin, Lailapur, Assam-ah kawngpui dan tihtawp a nih tak avanga ni tin mamawh bungrua lo lutte chu a daihzâi thei ang bera mipuiin an chan tlàn theih nan, mamawh aia tam chhêk khâwl lo turin mi tin an ngen.

Chawlhkar hnih dáwn hnuah Lailapur-a kawngpui dan hawn a ni ta chu lawmawm an tih thu sawiin CYMA chuan, "Mizo mipui dawhtheihna leh insûmtheihna avangin lawmthu kan sawi. Harsatna kan tawh mek laia kan unau, Mizoram páwn hmun hrang hranga awmte'n kan harsat hlaua an inpekna te, thâ leh zung, sum leh pái séngsoa min thlamuannate hi a ropui kan ti," an ti.

CYMA chuan, kawngpui a tlang theihna atana hma latu sorkar, kohhran, political party, Mizoram chhung leh páwna pawl hrang hrangte leh YMA sub-headquarters, group, branch-te chungah lawmthu an sawi bawk.

Ni tin mamawh bungrua lo lutte a daihzâi thei ang bera mipuiin an chan ṭheuh theih nan mamawh aia tam chhêk khâwl lo turin CYMA chuan Mizo mipui an ngen a; kawng hawn ni tawh mah se, harsatna thleng leh palh thei a nih avangin CYMA thu ngaichânga hma la thei turin YMA sub-headquarters, group leh branch-te a ngen nghal a ni.