COVID-19: Mizoram dinhmun Hripui vei 25 hmuh belh a ni

November 11, Nilaini khan Mizoramah Covid-19 hripui vei mi 25 hmuh chhuah an ni a, nimin khan hripui laka fihlim tawh mi 51 chhuahtir an ni thung.

Covid-19 vei Nilainia hmuh chhuahte chu mipa 15 leh hmeichhia 10 an ni a; ZMC laboratory-a hmuh mi 14 leh Rapid Antigen Test (RAT) hmanga hmuh mi 11 an ni. TrueNAT-PCR hmanga endik zingah hmuh chhuah an awm lo.

Nimin khan hripui laka fihlim tawh mi 51 chhuahtir an ni a, Aizawla enkawl vek an ni. SRH-ZMC aṭangin mi panga, Durtlang BSUP CCC aṭangin 33, Berawtlang CCC aṭangin pariat, Gilead Special School CCC aṭangin pathum leh home isolation-a awm mi pahnih an chhuak.

Mizoramah Covid-19 positive mi 3,242 hmuh chhuah a ni tawh a, mipa 2,412 leh hmeichhia 830 an ni. Nimin tlai dar 5 thleng khan mi 2,739 (84.49%) chhuahtir an ni tawh a, mi pahnih (0.06%) thi tawhin, enkawl mek mi 501 (15.45%) an awm.

Mizorama hripui vei hmuh tawhte zinga mi 1,464 chu Mizoram chhunga kái an ni a, mi 1,778 chu state páwn aṭanga rawn lut an ni.

November 11, Nilaini khan Mizoramah swab sample 959 endik a ni a; chungte chu ZMC-a endik 546, TrueNAT-PCR hmanga district paruka endik sample 80 leh, RAT hmanga district pariata endik sample 333 a ni.

Sorkar thuchhuah tarlan danin, ZMC laboratory-ah RT-PCR hmangin Covid-19 positive mi 14 hmuh chhuah niin, mipa paruk leh hmeichhia pariat an ni a, Aizawl district-a swab sample lak vek an ni. Mizoram chhunga kái chhâwng (local positive contact) 12 leh state páwn aṭanga rawn lut thar pahnih an ni a; a naupang ber nausen thla 11 mi a nih laiin, a upa ber chu kum 66 a ni thung.

State páwn aṭanga rawn lutte chu Damvenga nufa, hmeichhia kum 38 leh mipa kum 13 an ni a, Kolkata aṭanga rawn haw, home quarantine lai niin, symptom an nei lo. Mizoram chhunga káite chu table-ah tarlan a ni.

RAT hmanga hmuh chhuah mi 11 zinga pali chu state pawn aṭanga rawn lut thar an ni a, pasarih chu tualchhunga kái an nih thu, sorkar thuchhuahin a tarlang.

State páwn aṭanga rawn lut zinga pakhat chu Chaltlanga mipa kum 40, Haryana aṭanga rawn haw, Lengpui Airport screening point-a lo endiknaa hmuh chhuah a ni. Mi dang pathum chu 1st IR police hmunpui Mualvum, Kawnpuia awm mipa kum 31, 34 leh 35 an ni a, Bihar state assembly inthlanpuia duty rawn haw, Vairengte screening point-a lo hmuh chhuah an ni. State pawn aṭanga rawn lut zingah symptom nei an awm lo.