Mizoramin Congress politics tenawm a tuar - MNF party

MNF party chuan thuchhuah siamin, MPCC president Dr Lal Thanhawla'n Prime Minister hnena ramri chungchanga lehkha a thawn chu PM-in a ngaih pawimawh an rin loh thu leh Mizoramin Congress politics tenawm a tuar nia an hriat thu an tarlang.

MNF chuan, "Chief Minister hmalakna avangin Hailakandi lama rél kawng dangtu pawl pahnihte man an ni. Ni 10.11.2020 zanah Lailapur-a kawng dangtute Assam police-in an man khawm ta bawk," an ti a; chungte avang chuan lirthei tangkhangte Assam aṭangin Mizoramah an lut thei niin an sawi.

Mizoram sorkarin ramria buaina chungchangah theihtawp chhuahin hma a la nia sawiin MNF chuan, "Tun hma zawnga kan la hriat ngai loh, kan lo chêt ngam ṭhinna bak pèl rawkin Vairengte, Thinghlun leh Saihapui V-ahte mipui lam leh police-hoin awmhmun kan khuar belh ngam ta. Congress sorkar laia Zophaia buainaah khatih laia Home minister R Lalzirliana ruahmannaah MZP-te thla a muan hle laiin, Kolasib DC hmanga Pu Zira ruahmanna zu ṭhiahsaktu an awm a ni," an ti.

MNF party tarlan danin, kum tharah Assam an inthlang dawn a, tun aṭangin ṭan an la nasa ṭan hle a, an hmanraw pakhat chu ramria buaina siam a ni. Cachar, Karimganj leh Hailakandi district chhungah BJP-in MLA pakhat chiah an nei a, a bâk chu Congress leh an thawhpuite tlinna bial a ni. Congress leh an thawhpui MLA-te chuan an bial humhim theih nan mipui fuihpawrhin, Thinghlun, Vairengte, Saihapui-V leh Saiphaiahte Mizoram tibuaiin boruak an rawn siam ta niin an tarlang.

Congress party thil tih duh dan chu dâwta an khingpuite phiarrûk leh hêk a nia sawiin, "An la danglam chuang lo, a ngai reng an la ni," an ti a; PM Narendra Modi-a'n 'Congress ho ka duhsakna ber chu Congress an nihna an thaibo hi a ni' a lo ti tawh nia sawiin, "Mizoram aṭanga Congress hotupa berin lehkha a zu thawn a lo ngaih pawimawh thar thut chhan tur a awm a rinawm lo," an ti.