Ministry of Home Affairs (MHA) joint secretary Satyendra Garg kaihhruai Fact Finding Committee-in Mizoram leh Assam inrina, Inner Line Reserved Forest area, square mile 509 chhunga dan loa thil tih a awm leh awm loh enfiah tura Joint Committee a din chuan April 12, 2018 aṭangin enfiah hna an ṭan dawn.
Joint Committee member-te hi nimin khan Dholai, Assam-ah an ṭhukhawm a, Silchar-a chief conservator of forest Dr Vinay Gupta leh Mizoram Central Circle-a conservator of forest Lalthlamuana Pachuau ten an kaihruai.
Meeting-ah hian Mizoram aṭangin Conservator of Forest bakah, Kolasib DC R Zarzosanga, Kolasib SP Abhishek Dhania, 1st IR Bn. commandant HL Thlangzuala, MZP aiawhin Vairengte MZP president Israel Lalropuia, Kolasib MZP secretary Zosangliana Rokhum, Vairengte Joint V/C president Zalalalawta, Kawrthah DFO, Kolasib DFO leh Vairengte SDPO-te an tel.
Assam lam aṭangin CCF bakah, DIG (SR) D Ipadhaya, Hailakandi DC, Hailakandi SP, Cachar leh Hailakandi DFO, Cachar Additional DC, Katicherra SDO (Civil) leh mipui aiawh mi panga an tel a ni.
Meeting chuan, Inner Line Forest Reserved square mile 509 chhunga dan loa thil tih a awm leh awm loh enfiah hna chu April 12-a ṭan an rel a; enfiahnaah hian Joint Committee member-te an tel ang a, police venhimna hnuaiah enfiah hna an thawk ang. Enfiah hna hi Zophai aṭanga ṭanin, Phaisen, Vairengte leh Lailapur inkar leh Aitlang leh a chhehvelte a indawtin enfiah tur a ni.
Joint Committee ram enfiah hna thawhna atan April 30, 2018 thleng hun pek a ni a; meeting chuan, hun tiam chhunga an zo hman lo a nih chuan thuneitu sang zawka hun pek belh dil ni se, an ti.
Tarlan tawh angin, March 28, 2018-a Ministry of Home Affairs (MHA) joint secretary Satyendra Garg hoa Assam Home Secretary, Mizoram Home Secretary leh Mizoram NGO-te Zophaia ṭhukhawm chuan, Assam inrina Inner Line Forest Reserved square mile 509 chhunga dan loa thil tih a awm leh awm loh enfiah turin Joint Committee din an remti a ni.
Satyendra Garg chuan, Joint Committee din remtih a nih thu thuthar thehdarhtute hmaah a puang a, "Anni hi a ṭul angin police-in an pui ang a, civil society-te pawh an tel ang," a ti a; Assam leh Mizoram sorkar ram inchuh chu Inner Line Forest Reserve chhunga dan loa thil tih a rem loh thu a sawi.
MHA Joint Secretary sawi danin, Joint Committee chu April 30, 2018 hmaa report thehlut tura tih an ni a; anni hian dan loa thil tih an hmu a nih chuan, a awm zui zel loh dan tur ngaihtuah dawn a ni.
