An candidate hnawl vangin SEC-ah MNF an zualko

April 20, 2018-a Chakma Autonomous District Council (CADC) inthlan turah Fultuli constituency-a MNF candidate Sunir Tongchongya hnâwl (disqualify) a nih chung­changah MNF Legal Board chuan State Election Commissioner L Tochhawng hnenah complaint an thehlut.

MNF Legal Board chiarman J Lalremruata Hmar chuan, Governor Rule-a CADC a awm tawh hnua Mizoram sorkarin returning officer tura dah Lawngtlai DC chu âwn lam neiah leh dan tlawhchhan mumal nei loa ro relah an puh tih a sawi a, "Eng ang pawhin election certificate hi lo issue tawh mah se, a kaltlang dawn lo tih ka sawi duh. Fultuli constituency-ah hian free and fair impartial election kan nei ngei dawn a ni," a ti.

J Lalremruata chuan, "State Election Commission hian Returning Officer thutlukna hi a sût ngei kan beisei. Kan beisei anga thil a thleng lo a nih chuan MNF party chuan inthlanna felfai a awm ngei theih nan na takin hma kan la zel dawn," a ti a; Returning Officer thutlukna chu a dik loh avanguin an ṭhiat ngei dawn tih sawiin, "Inthlanna felfai kan nei ngei tur a ni," a ti bawk.

State Election Commission-a MNF Legal Board Chairman-in complaint a thehluhnaah hian MNF ṭhalai president Lalrin­awma, MLA leh MNYF hruaitu dangte'n an ṭawiawm a ni.