Zirlaite zinna atan pawisa dah turin Ruahmanna kalpui a ni - HTE Minister

Higher & Technical Education (HTE) minister R Romawia chuan, zirlaite zinna (study tour/excursion) atan Mizoram sorkarin pawisa a dah ngei a rin thu a sawi a, "Ruahmanna kalpui mek a ni," a ti.

Vanglaini palai zawhna chhang­in R Romawia chuan, zirlaite'n an zinna tur dah tura an hrilh awm a hriat loh thu a sawi a, "An rawn sawi takah chuan kei pawhin dah âwm takah ka ngai a, dah dan tur kan ngaihtuah nghal. HTE Director-te ka bia a, zirlaite zinna tura sum dah hi tih âwm tak a nih thu ka hrilh a, Chief Minister leh Finance Minister-te pawh ka be nghal a ni," a ti.

HTE Minister chuan, zirlaite beisei angin cheng vbc. 5 zinna atana dah turin department chuan ruahmanna an siam thu sawiin, "Kan bawhzui char char a, tunah hian file pawh Finance Minister-in a hmu tawh a, pawisa engzat nge an dah dawn erawh kan hre lo," a ti a; pawisa chu zirlaite beisei ang zat dah a nih loh pawhin, zinna tur pawisa dah a nih ngei a beisei thu a sawi.

R Romawia sawi danin, Mizo­ram union territory a nih laiin zirlaite zinna atan budget-ah Rs. 30,000 - 50,000 dah ṭhin a ni a, mahse, state nih hnuah erawh zirlaite zinna tur sum a ni tawh ngai lo.

Tarlan tawh angin, MSU leh Aizawl City College Joint Student Union (ACJSU) chuan April 10, 2018 hma ngeia zirlaite tana study tour/excursion neihna tura cheng vbc. 5 dah turin Mizoram sorkar an phût a, an thil phût tihhlawhtlin a nih loh chuan Finance minister Lalsawta leh HTE minister R Romawia te chu báng turin an phût a ni.