CM Rural Housing Scheme tlangzarh

Chief minister Lal Thanhawla chuan nimin khan Serchhip DC Conference-ah NEDP hnuaia khua leh tui harsa zawkte'n chenna in ṭha zawk an neih theih nana hmalakna, Chief Minister's Rural Housing Scheme a tlangzarh a; mi 200 hnenah ṭanpuina a sem nghal.

CM Lal Thanhawla chuan, kut hna­thawkte'n mahni khuaah leirem an rah a, khaw êng hmua thlamuang taka an awm theih chu sorkar duh ber a nih thu a sawi a, "NLUP leh CM Rural Housing Scheme-te hi chumi rilru aṭanga lo piang a ni. Rural Housing Scheme hi chenna in thar sakna tur ni loin, mahni chenna in chung chih ṭhatna tur nei zo lote'n fûr laia thlamuang taka an awm theih nana ruahman a ni," a ti.

NLUP chu thlakipa sorkar hnathawk hlawh late leh sumdawng hausate ni loin, mi harsa kut hnathawka eizawngtute an intun dinna tur a nih thu sawiin Lal Thanhawla chuan, "NLUP hi kut hnathawktute'n an thawhrim rah mawlsawmna an lo hmuh theih nana bul ṭanna siamsakna tur a ni," a ti a; NLUP avangin Mizoramin ei leh bara hmasawnna a hmuh thu a sawi.

Chief Minister chuan, Mizoram chu ei ṭâwk ṭâwk economy aṭanga market economy-a chho turin sorkarin NEDP a duang tih sawiin, "NEDP hi NLUP hlawhtlinna tinghettu a ni. NEDP hnuaiah hian remhria leh taimate chuan an thiamna hmanga an bul ṭannaah, sokar ṭanpuina leh kawhhmuhna hmangin eizawnna ngêlnghet siam a, mi dang tan eizawnna siamtu an ni thei dawn a ni," a ti.

CM Rural Housing Scheme hnuaiah hian a hmasa ber atan Serchhip district chhungah beneficiary 200 thlan chhuah a ni a; East Lungdar RD Block aṭangin mi 38, Serchhip RD Block aṭangin mi 162 an ni.

Sorkar thuchhuah tarlan danin, ṭanpuina dawng tur thlang turin a tirah Gram Sabha koh a ni a; mipui kalkhawmte'n ṭanpuina dawng âwm nia an hriatte an thlan hnuah, VLA-te'n a hmunah an endik a, District Level Selection Committee hnenah thehlutin, anni'n ṭanpuina dawng turte an lo thlang a ni.

Ṭanpuina hi beneficiary pakhatin Rs. 50,000 zel an dawng dawn a, instalment hmasa zawkah Rs. 30,000 pek niin, an hman ṭhat dan azirin a dang Rs. 20,000 chu instalment hnihnaah sem leh tur a ni.