Vety department-in vawk vulhtute fimkhur turin chah

AH&Vety department chuan thuchhuah siamin, nipui lai, March - May inkar chu vawk natna, swine fever leh PRRS lên duh hun a nih thu an tarlang a, "Vawk vulhtute tan inven fimkhur a ṭul," an ti.

Swine fever leh PRRS-te chu vawk leh sanghal chauhin an vei thei a, mihring tan a hlauhawm lo tih tarlangin AH&Vety department chuan, "Ran lei thar chu ran vulh lai nen dah fin nghal mai loin, ni 30 tal a hranga dah tur a ni. Ran hri lên lohna hmun aṭang chauhin ran vulh tur hrisel lei tur a ni," an ti a; ran vulhtute chu an ralh vulhna hmun mi dang tlawhtir lo turin an chah.

AH & Vety department chuan, ran hrileng vanga damlo emaw, thi a awm chuan a awmna local council/village council emaw, Vety centre hnai berah hriattir vat tur a nih thu an tarlang a, "Ran a thih chuan thûk takah uluk taka phùm tur a ni," an ti.