Motor-in nufa a chíl hlum

April 8, Pathianni chawhnu dar 3 vel khan Thenzawl dáia Tourist Lodge bulah motor-in Lalngaihsaki (40) leh a fanu puak lai, kum khat chuang hret a chil hlum. Lalngaihsaki hi Ngúr, Champhai district chhuak, Thenzawla pasal nei a ni a; Thenzawl leh Sialsuk inkara Charpui-ah in luahin a fate pathum nen an khawsa a ni.

Thenzawla Vantawng editor Liantluanga Renthei hnen aṭanga thu dawn danin, nufa chiltu motor hi a tlân tlang avangin eng motor nge tih hriat a la ni lo a, Lalngaihsaki hi a fate pathum nen kawngpuia an kal laiin motor-in a su a, a fate dang an him laiin, amah leh a fanu a puak lai chu motor-in a su hlum a ni.

Police-te chuan Then­zawl Auditorium sak meknaa truck, Ashok Leyland khalhtu pakhat leh a motor chu rinhlelh thilah Pathianni zan khan manin, Serchhipah an hruai nghal a; truck driver erawh chuan mi a chîl a hriat loh thu a sawi avangin nimin tlai thleng khan thu chiang hriat a la ni lo.